I. Lanu Toy taküm otsü kaket sayaogo

January 27, 2019 nü Hotel Vivor, Kohima nung  Er.Lanu Toy taküm otsü kaket sayaba sentong nung Rev Dr Mar Atsongchanger Executive Secretary ABAM, Er & Mrs I. Lanu Toy aser kaketzülur, Repalemzung Longkumer nunger külemi tangokba noksa nung angur. 

Kohima, January 28 (TYO): January 27, 2019 nü I. Lanu Toy arishi küm 92 ajungba anogo nung pa taküm otsü kaket “Tsüngchi Samanir Ka (Biography of I. Lanu Toy)” Hotel Vivor, Kohima nung sayaogo.
Iba kaket ya Wb. Repalemzüng Longkümer, Editor, Lenjeter-i zülu aser Rev. Dr. Mar Atsongchanger, Executive Secretary, ABAM-i sayatsü.
Kaket nung itemi zülua lir, “I. Lanu Toy shisaliok bushiba mapang (1934-1954) atalokbatem, 1954 küm Northeast India nung mezüngbuba hydro project ‘Umtru Hydro Electric Project’ pa lenisüba nung inyaka arur 1958 küm commission asüba, 1961 nung Tokyo Japan tashi oa training agiba, 1966 nungi tenzüka Nagaland nung Power Department ketdang asüba, Doyang ayong 1968 küm survey agia tenzükba nungi 1990 küm pai anir Doyang Hydro Electric Project inyakba, pa kaket shisatsü bushiba mapang nung pai timtem tejashi aser mulungzürep tia balala ajangshiba, Government mapa nung tetsükdaktsü tensa balala ajuruba, pa tebu tajung ka aser ochi nungi matsüngshii noktaktetba samanir ka; item ajak jagi iba kaket azünger shia nem tatishitsü aser tajungshiba I. Lanu Toy taküm ajanga agütsüba angutsü.”
Limawati Longchar, Director, IPR-i sentong ketdang asü aser Rev. I. Bendangmeren, Pastor, KABA-i sarasademer tenzük. Kaket züluri Lanu Toy taküm otsü kaket züludang ajangshiba lemsatep aser Lanu Toy-i tenüngsang agüja jembi.
Sentong nung adener rongnungi C.T.Jamir, Senior Advocate, Gauhati High Court, Kohima Bench, Kohima, I. Meyionen, Director & IGP, Vigilance Commission aser K. Tiayanger, Rtd. Principal Director, Treasuries & Account nungi jembi aser KABA Pastor Sentisashi Aier-i sarasademer sentong tembang.
Iba kaket item tesemtem nung angutsü – Kohima nung Woodland Handicraft, Opp. State Library, Dimapur nung Modern Book Depot, Christian Literature Centre, Mokokchung nung Eastern Book Depot (ABAM) aser CTN nung Classmate CTN nung angutsü.