Rio-i junga inyakogo

Nagaland nung Neiphiu Rio Chief minister kümer külen saisapong tsütsü temulung tali agüja anepalua anguba tongtibang mapa anaji, ka Sovima (Dimapur) nung Cricket stadium yanglua sayidaktsüba ya asütsü aser ano kaji, tang Kohima nung Indira Gandhi Stadium nung nisungi yangluba ayi ( artificial turf) agi football ground ajak kanga junga lembanga lemer asayadaktsütsü asoshi renemtsübaji asütsü. Atangji, senbo crore tenet dak tali aoba osang metetdaktsüogo, ajisüaka sen endok langa Nagaland asoshi mapa tajung ka inyaktsüogo ta pelaa bilemer. Iba ama putu tensa den apet asayadak tajung yanglubaji asayartem asoshi dang masü saka state nung senso ajak asoshi nümadangtsü mapa ka lir. 1948 küm London nung Summer Olympic asaya nung mezüng India football team nung captain ser aosang Naga nunger Dr.T.Ao sülenbo alimai metettsüsa Naga nunger shinga madoker. Ibayongji, tanü tashi Nagaland nung football otsübo tejen otsü jembir amai dang jembir. Aji oda, Dr.T.Ao sülen küm 70 nunga Naga nunger kata India team nung adentsüsa madoktetbaji government nung sentong yanglurtemi anir asenok ajak tai lir. Iba tamakokji kodang asenoki bilemdangdir, lanurtem dak sempetr liaka tangartem den toktepa saidaktsütsüsa asenoki anepalu masür. Ashiko, tanüa Nagaland nung akaba Sports school nung azüngertem tiaji reprangdangra, parnok asoshi renemtsüba kiojen, chiyongtsü aser asayadakji National aser International asayamong nung asayadaktsütsü nükla yur anepalurbo memesük temeimtsüka aser tezüdangtsüka angutsüa akok. Iba kasaji Nagaland nung football ground yangluba nung government senpong nungibo sen aika endoker alitsü saka tangar jaoka asayatsüsa ground kata maka küm talangka arur. Tang tashi asenok Inter districts aser inter clubs football asayamong asayadang lishi mezüa asayar aser tzünglu marura auyi agi ball dena mangu küma auyi longa asayar. Itemji reprangdangbo Dr.T.Aoer lima-a ta mesünütsüka taaktsüka bilemer. Iba ama asayar tajung adokba lima nung asayadak tajung kata merenemtsütetbaji angudangbo state nung Sports mesüra Youth Resources department-a mali ama bilemtsüsa asenok alir. Joko, Meghalaya nungbo yakta National games asayatsü aser Manipur nungbo asayaogo. Tanübo joko lishi mezüa, auyi ponga ground tilala nung mapang endoka asayaba putu masü saka asayaba ya rongsen anguba industry tuluka kümogo. Anungji, sempet alirtembo peisasa pei taküm azüoka temulungtetba tulu nung asayaji pei mapa kümer nüngtugu küma asayatsü bilemtsüla. Atangji, kechi mapa reprangdir reprangaka pei dak tejangraba aser tangatetba alitsüla. Iba jagi dang nübortem ajangzüktsüsa mapa inyakteta aotsü. Karibo tejangraba aliyonga yimkong tajung akümtsü bilema masü saka pei kija atema bilema pei kima asayadak tesem-ang ka yanglutsü mesüra nübortem dang lenmang sayua alu tapu balala yimdaktsütsü melen pei kija asoshi dang ayimtsü. Iba ama tang aser tarutsü nung yimkong ajungtsü bilema masü saka pei kija agitsü aser ajungtsü bilema inyakba agi nübortem rongsenren jenjang nung merenloktetba dang masü saka mapang talangka tangar menepa asayar kata madoktet akoksadaktsüogo. Ibaji kanga tesasatsüka lir. Ajisüaka, tang nungi danga shir, Neiphiu Rioi chief minister tashi amshia Nagaland nung saisapong ajungkettsütsü asoshi ajaki ngua mapa küma inyakba amaji asenok ajaki inyaktsüla. Joko, Indira Gandhi Stadium nungi tenzüker district shia kasa ground kakabosa yanglua aotsü sentong lir ta angashidang kanga yongyar. Itemji District shia nung Sports Association-temi anir ajungshia mapa küma inyaktsü junger. Nagaland yabo chiajema pelatepba benjong lima ka dang masü saka saisapong sentong tulu ayongzüka nübortem pelatepba benjong lima ka asütsüsa taruba küm ter tsüngdangbo National Games ayongzüka asayatsüsa, government nung alirtemi tejangraba aser temulungtetba tulu nung saisapong sentong tenzüktsü junger.