59 buba O.M lokti senden takok ngua mungogo

59 buba Ongpangkong Mongdang lokti senden nung Mokokchung Village Council-i sobaliba ken ka ajanga shilem agiba mapang tangokba noksa nung angur.

Mokokchung, Jan 29 (TYO): 59 buba Ongpangkong Mungdang lokti senden Jan 29 nü yangi Mayangnokcha Government Hr. Sec. School Auditorium Mokokchung nung takok ngua mungogo. Iba mungdang nung OM kübok yim aser unit 31 nungi tejaoker noklang pungu shi adenshia shilem agia aden.
Iba sentong nung Minister for Urban Development & Municipal Affairs Govt. of Nagaland, Metsübo Jamir-i mapang tatsüka agia jembidang, Ongpangkong nunger dak Aori dang masü saka Naga kin rangbeni rangloker, anungji, Aoli tebu ka ama tali temeimtepba, telungjemba aser putepa alitsü asoshi tayongzükba ka agütsü.
Paisa nüburtem memangmangtsü atema citizenship amendment bill (CAB) indang jangjashitsüdang, Nagaland atemabo Indian temzüng kübok Arla 371 (A) aser Inner Line Permit (ILP) nung tashi ajak agüja lir aser iba ya “Act of Parliament” ka lir, anungji, itemji ajanga asenok kümzüktsü, ta ashi. “Tangar asaba agi asenok memangmangtsüla aser iba bill-ji ano mapa mekümi lir”, ta paisa shisem.
State sorkari Naga yimden tebilemtsüji tatembang kati latettsü asoshi akokba tashi apu latsüba maparen balala inyaka odar, anungji, iba dak sentakba nung Naga nunger ka küma lungjemtsü asoshi Ongpangkong Mungdang-ia shilem agia nungitdaktsünür, ta mepishia ashi.
Tanü alima ya tashi temetetba nung toktepba putu lir, anungji, Ongpangkong lima nungi tarutsü nung lanur tajung jenti adoktsü nükjidong yur merangtsü asoshi paisa ayongzüka liasü.
Sentong nung Mokokchung District Horticulture Officer, P. Kilemsungbai “tanü aser asüng Ongpang tia” onük nung ajemdaker tagitsü shisa rajem aika bener arua mungdang sangertem den lemsatep.