Sorkar telemtetba ajanga Ram tekülem ki yanglutsü atema lenmang lapoktsü: BJP

New Delhi, January 29 (Agencies): Tanü BJP-i, sorkari Supreme Court dang Ayodhya nung mangatettep li nungi ali acre 67 bo Ram Janmabhoomi Nyas nem meyipa agujang ta mepishitsü asoshi telemtetba agibaji kanga tongtibang, aser ibaji ajanga Ram tekülem ki yanglutsü atema lenmang lapoktsü, ta metetdaktsü.
BJP-isa, ajisüaka sorkari Ayodhya nung mangatettep li nungbo mekongshir, ta ashi.
Tanü New Delhi nung BJP headquarters nung osangbenertem senden nung jembidang Union Minister, Prakash Javadekar-i, “Tanü agiba telemtetbaji kanga tongtibang, aser ibaji ajanga Ram tekülem ki yanglutsü atema lenmang lapoktsü,” ta metetdaktsü.
Paisa, Ram tekülem ki yanglutsü atema BJP-i inyaker aser iba atemaji legal mera agia inyaktsü, ta ashi.
“Ato kilonserisa television interview ka nung, nüburtemi tekülem kiji aginer, ajisüaka iba atemaji tim lenmang ajanga inyaktsü ta shiogo. Tanü agiba telemtetba ya-a legal telemtetba ka lir,” ta paisa ashi.
Javadekar-i, Ayodhya nung mangatettep li meketa aliba alitemji kiburtem nem sorkari meyipa agutsünüa telemtetba agibaji nüburtemia pelaa agizüker, ta ashi.
“Ali acre 67 nungi acre 42 kiburji Ramjanmabhoomi Nyas lir. Anungji sorkari iba liji Nyas nem meyipa agutsüner, kechiyong parnoki idakji tekülem ki yangluner,” ta paisa metetdaktsü.
Pai ashiba agi, iba ken o ya küm 70 tashi mangatettep ken o ka lir aser kanga menoa obendang magutsüba ajanga tetsükdaktsü adoker.
Congress aija Javadekar-i, Congress-i legal tsütsü tetsükdaktsü agutsüba ajanga Ram tekülem ki menoa meyangluteter, ta ashi.