Minimum Income Guarantee atema maparen tenzükogo: Ashok Gehlot

New Delhi, January 29 (Agencies): Congress Party Tir, Rahul Gandhi-i linük nung sensakertem atema minimum income guarantee sangdongba pelaa agizüka tanü Congress lenir aser Rajasthan Chief Minister, Ashok Gehlot-i, iba scheme atema pai maparen tenzükogo, ta metetdaktsü.
Gehlot-i, linük nung sensotem nem minimum income guarantee agutsütsüsa linük dak tashi lir, ta ashi.
New Delhi nung osangbenertem den jembidang pai, “Iba sangdong ya puti otsüsütsüsa ka lir. Iba scheme mapa küma benoktsü atema tanü nungi ni iba maparen tenzükogo,” ta metetdaktsü.
Paisa, Congress Party-i sorkar akumba state tem- Rajasthan, Madhya Pradesh aser Chhattisgarh sorkartemi Rahul Gandhi-i state elections jakdang nangzükbatem mapa küma inyakdar, ta ashi.
“Rajasthan, Madhya Pradesh aser Chhattisgarh assembly elections jakdang pai (Rahul) kechisa nangzükogo, itemji onoki ataloktsüdar; item rongnung aluyimba loan atokba aser mapa mengui alir lanurtem atema allowance densema lir. Gandhi-i sangdongba minimum income ya puti otsüsütsüsa ka lir,” ta Chief Minister-isa ashi.
“Sorkari dang melungtetra ajakji takoktsü,” ta pai ashi.
Yashi Rahul Gandhi-i, taruba Lok Sabha elections nung Congress-i takok ngua Centre nung sorkar kümra party-i sensaker shia nem minimum income guarantee agutsütsü, ta sangdonga liasü.