India tetsür hockey team-i Spain 5-2 agi tsükdaktsü

Murcia (Spain), Aenjeti/January 29 (Agencies): Spain o India na tsüngda tetsür hockey asayamung tasembuba Aenjeti/January 29 Mongolbarnü asaya nung India tetsür team-i taoba World Cup asayamung nung Bronze medal angur telok Spain tsür madak goal 5-2 agi takok ngua liasü.
Iba asaya nung Mizoram tsür Lalremsiami-i ( minute 17buba aser 58buba) nung goal ana idakja liasü. Kasa asaya nung Neha Goyal-i (minute 21buba), Navneet Kaur-i (minute 32buba) aser Rani Rampal (51buba) nungeri goal ka ka idakja takok nguogo.
Asaya tasembuba takok ngua tang India o Spain na tsüngda series 1-1 kümogo. Asayamung mezüng asaya nung India tetsür team-i goal 2-3 agi Spain tetsür team makokba sülen, tanabuba asaya nung India aser Spain na tsüngda goal 1-1 draw nung tembanga liasü.
Aenjeti 29 nü tasembuba asaya nung mezüng goal ji Spain tsür Berta Bonastre ajanga minute 7buba nung idakja liasü.
Ajisüaka, temulungtetba tulu nung asayar telok India-i mapang melaui minute 17buba nung striker Lalremsiami ajanga mezüng goal idaktsü aser minute pezü sülen India tsür Neha ajanga goal tanabuba idakja India tema goal 2-1 agi tajakdang kümadok.
Maneni, minute 32buba nung India tsür Navneet-i India atema goal tasembuba idakja liasü.
Bonastre-isa par telok atema minute 35buba nung goal tanabuba idaktsü saka India nunger goal 3-2 agi tejakdang liasü.
Minute 51buba nung Skipper Rani-i lar telok atema goal pezübuba aser full time ajungtsü minute 2 anunga lia striker Lalremsiami-isa la indang tanabuba goal idakja lai lar telok atema goal pungububa idakja India tema goal 5-2 agi takok angu.
India aser Spain na tsüngda Aenjeti 31 Brihostibarnü pezübuba hockey asaya akatsü renema lir.