20buba Inter District Football C’ship (Dr T Ao Trophy) tenzükogo

Kohima, Aenjeti/January 29 (TYO): IG Stadium, Kohima nung tawa tanü amenokba Astro Turf ground tasenba nung Department of Youth Resources & Sports-i ayongzükba 20buba Inter District Football Championship (Dr T Trophy) asayamung January 29, 2019 Mongalbarnü tenzüktsüogo.
Iba asayamung mezüng anogo nung Mokokchung District Football Association (DFA), Tuensang DFA aser Kohima DFA nungeri pei tata asaya nung takok ngua liasü.
Mezüng asaya nung taoba küm takok angur Mokokchung DFA-i Longleng DFA madak goal 5-2 agi takok ngua liasü.
Iba asaya tenzükli nungi Longleng teloki kanga kara asaya tenzük aser minute 7 o 9buba nung Longleng nungi asayar Chingshen P Buchem aser Shepa B nati kanga gola ka ka idakja liasü. Ajisüaka, mapang tatsüka tsüngda nung Mokokchung nungi asayar Suponglemba-i minute 10 aser Toshiwapang-i minute 25buba nung goal ka ka idaktsüba sülen telok ana tasüng tsüngda goal 2-2 kümadok.
Half time atongtsü minute 2 anünga lia aser telok ana tsüngda kanga dang toktepa asayaba mapang Mokokchung nungi asayar Suponglmbai-sa ano minute 42buba nung par telok atema goal tasembuba idakja first half tembanga liasü.
Lemon break sülen, asaya tenzüka aoba mapang Mokokchung nungi asayar Temjentoshi-i minute 61buba nung gola pezübuba idaktsü aser minute 66buba nung Suponglemba-i pa indang hat-trick goal den par telok atema goal pungububa idakja iba asaya takok ngua liasü.
Tanabuba football asaya nung, Tuensang-i Dimapur DFA madak goal 3-0 agi takok angu kong Tuengsang DFA nungi asayar L Longkhoi Khiamniungan-i minute 61, 69 aser 72buba nung goal asem idaktsüba ajanga par teloki takok ngua pai iba asayamung nung hat-trick goal tanabuba ngutetogo.
Kasa asayamung nung asaya tasembubaji Kohima aser Mon DFA na tsüngda asaya liasü kong Kohima DFA-i goal 2-1 agi takok ngua liasü. Asaya tenzüker first half tsüngda nung Yhunshalo Kemp-i penalty ka metsüpet saka paisa minute 18buba nung in mezüng goal idakja liasü. Minute 40+40 asaya second half tenzüker minute 2buba nung Menguzelie Rutsa-i Mon atema goal tanabuba idaktsü. Tesüsa asaya tatemleni minute 73buba nung Mon nungi asayar M Angki Konyak ajanga goal ka idakja liasü.
Tanü January 30, 2019 atema asaya yamai alitsü:
Wokha vs Phek @ anepdang 10:00 ako
Peren vs Kiphire @ nikongdang 1:00 ako