CNTC-i Jan 31 senden nung madentsü tuyur

Dimapur, January 29 (TYO): State sorkari January 31, 2019 nü Chumukedima, Dimapur nung senden amentsü ayongba nung Central Nagaland Tribes Council (CNTC) nung züngsema alirtem shinga madentsü atema tetuyuba ka agütsüogo.
Mapang shia sorkar ketdangser aser yimten yimsüsür kari asaa CNTC hao ta mali senzüka yutsüyonga arur saka iba tangatetba ajanga parnoki yimtenren tsütsü telemtetba tajung magiteti arur. Tanga teloktem nung züngsema alirtem ajak jaoka senden amendang kechiba tongti kintemi tentetba sabangbo senzüka yutsür ta CNTC-i asüngdanger, ta Media Cell sangdong ka nung ashi.
Nagaland nung aliba kintem teimba maliba aser tasür telok Naga Hoho-bo jaok saka Naga customary law ketdangsür Nagaland GB Federation (NGBF)-bo senden nung mejaokba atema CNTC-i ashishir, ta parnokisa ashi.
Cabinet-i CAB magizüker ta lemtetatoker asü nung iba shisalemsatepba senden ayongba ya tejak meitsü mapa ka dang lir, kechiyong telemtetba agiadoker asü nung kechiba mapang, tashi aser rongsen lalutsü? ta CNTC-isa asüngdang.