PM Modi-i Salt Satyagraha memorial aser museum semzüktsü

Mumbai, January 30 (Agencies): Tanü Mahatma Gandhi sür küm 71 ajungba anogomong nung Gujarat nung Navsari district kübok Dandi nung Ato kilonser, Narendra Modi-i National Salt Satyagraha Memorial aser Museum semzüktsüogo.
Iba memorial nung Mahatma Gandhi indang kürakyanglutem aser 1930 küm Dandi Salt March nung Mahatma Gandhi den külemi shilem agia jajar ‘satyagrahis’ 80 lir.
Iba museum nungji Dandi March mapang nung atalokbatem indang noksa 24 lir.
British nunger yimsüsüba anema Civil disobedience movement dak sendakba nung Gandhi leniba nung satyagrahis 80-i Sabarmati Ashram (Ahmedabad) nungi tzüyimkümlen aliba yim Dandi tashi mile 241 tetsüng agi jaja, aser tzüyim tzü agi metsü yanglua liasü; ibaji ajanga British nungeri benokba Salt Law raksatsü.
Tanü nikongdang Ato kilonser, Modi-i New India Youth conclave nung shilem agirtem den jembiogo.
Mahatma Gandhi ya 1948 küm January 30 nü Hindu alia amanger, Nathuram Godse-i khaset. January 30 nikongdang 5:17 ako meta Mahatma Gandhi Birla House compound nung khaset aser tangbo iba tesem dang Gandhi Smriti ta ajar.