Taoba SC judge Katju-i Manipur CM mokdangtsü ayongzük

Imphal, January 30 (Agencies): Manipur nung journalist Kishorchandra Wangkhem mechiok tashi public-i Manipur chief minister N. Biren Singh mokdangtsüla ta taoba Supreme Court judge Markandey Katju-i ashi.
Wangkhem-i Biren Singh, Prime Minister Narendra Modi aser Rashtriya Swayamsevak Sangh (RSS) anema jembiba atema tai tonglokja tepuokdak yua lir.
Pa ya private channel ka nung news editor lir aser yaküm November ita tenüng menüktsüba ken o nung mezüng tai tonglokja apu saka bail nung chiok. Iba sülen pa tanaben apu aser National Security Act kübok aija küm ka tepuokdak ayutsü temerenshi agütsü.
Wangkhem kinungtsü Ranjita Elangbam-i governor tetuyuba anema Manipur High Court nung ken o ka benoka lir aser ibaji Hokolbarnü angadangtsü.
“Manipur nungertemi India len anitsüla. Nenok chief minister Biren Singh tekolok meshitak kümogo aser tashi agi mesepa lir. Pa merenshitsü atema lenmangtem bushiang. Mezüng nenoki pa yimjak nung mokdangang. Pa adenba lokti sentongtem nung deden aser shirnok dendir parnokjia nenoki mokdangang. Pa public sentong kecha nunga tejaok. Pa lokti nungi züngdoker ka ama amshiang” ta Katju-i ashi.
Elangbam-ia lokti sentong aika nung jembiogo aser lai ashiba agi, nisungtemi lar jala ana dena lar kibong bendanga amshir.
“Nisungtemi onok ya ozüng alema mapa inyakertem ama repranger. Parnoka aputsü ta tsübuba agi nisungtemi onok den o mejembii kümogo. Pa (Wangkhem) ya teti ozüng alema inyaker nisung ka ama kümdaktsüogo aser pa yi jemer ka aser tetsür anishir ka ta tiyazü olulutem prokshia jembir. Ajisüaka, iba ama tiyazü osangtem ajanga ochi menembangtettsü. Jala ana tetsü ka ama, ni democracy mesüra meimchir temeten lir asü mali ta ratar” ta lai ashi.
Elangbam aser lar lawyer Shreejit Bhavsar na mezüng nungbo Wangkhem den ajuruteptsü atema temelaba magütsü.
Manipur Students’ Association Delhi (MSAD)-i Wangkhem chiokang ta takhangba agüja nungitba atema Elangbam-i parnok dang pelaba metetdaktsü.
Manipur nungertem atema National Security Act ya kecha balaka masü kechiyong parnok alima tamajung ka nung alir. Manipuri loktiliba tanü tashi tetsübu tia ka nung alir aser iba tensa anema noktak shia parnok alenbanger, ta MSAD president Thokchom Veewom-isa ashi.
Sorkari nübortem o jembitsü temeten ajembanga ayuba mapa tamajungtibaji iba ya lir. Hokolbarnü journalist temi okadak adenshia Wangkhem posema nungittsü ayongzüker, ta Indian Journalists Union secretary general Sabina Inderjit-i metetdaktsü.