Tejak Tasen Ka

Lok Sabha election agitsü ita 3-4 dang lia Gandhi kibong nungi Priyanka Gandhi-i yimten nung ajemokba ajanga Congress jenjang ajungtsü asü majungtsü?, ta aikati shisadanga jembidar. Congress Party Tir, Rahul Gandhi-i teno, Priyanka Gandhi Vadra, Uttar Pradesh east nung General Secretary shimba ajanga party takoksa dang nungibo tajungzük tuluba angutsü ta pai seret odanger ang shim südi ta bilemer. Priyanka-i yimtenren nung ajemokba osang sangdongli BJP-i, ibaji kibong kati yimsüsüba tatishitsü lir ta aitsüogo. Lok Sabha nung menden 543 lir, aser state tem nung Lok Sabha menden timbaji Uttar Pradesh (menden 80) nung lir, anungji Centre nung sorkar akumba nung Uttar Pradesh-i shilem tulu agir. Iba denji külemi UPA mendenbula, Sonia Gandhi aser Congress Tir, Rahul Gandhi na toktepba menden-a UP nung lir. UP nung tongti party ana- SP aser BSP nati taruba Lok Sabha election nung lokteper tokteptsü ta sangdongba sülen kobi melii Priyanka-i yimtenren nung ajemokba dang masü saka lai state tesadang kabo ayimjema inyaktsü, aser ibaji ajanga SP-BSP jenjang-a raksatsütsüa akok ta yimtenren mongintemi ashir. Priyanka-i yimtenren nung ajemokba kuli aika alitsüa akok, ajisüaka tongtibang kuli ana rongnung- tetsü, Sonia Gandhi temang manemi dang aliba ajanga; mesüra party nung bangdak lenir aikati la dang party nung yakyaka inyaktsü akhangba ajanga asütsü südi ta bilemer. Lai yimtenren nung majemokaka elections nung tetsü aser tedi na toktepba constituency- Amethi aser Rae Bareli na nungbo lai nübo yimjasa aruogo. India nunger aikati Rahul dang nungibo Priyanka-iang nisung timba atsüer arutettsüsa o tsüngrosonga jembir, iba dak alia nisung aikati Priyanka ya tetsü (otsüla) taoba mapang Ato kilonser, Indira Gandhi küp shizük, ta jembir aser aikati la sapur. Tang linük nung tetsürtem tashi atema kanga tongtibangsüa inyakba mapang ka nung lai yimtenren nung ajemokba ya tetsür aikati pela agizüker aser pusemtsü ta jembiba social media nung angur. Opposition party lenirtemia la nübo ajungbaji nangzüker. Tang tashi nungbo lai taruba election nung tetsü melen Rae Bareli nungi tokteptsü asü metokteptsüar mejangjar, ajisüaka lai mapang talangka yimtenren nung inyaktsü südi ta bilemer. Ano külenbo Priyanka kinüngbu, Robert Vadra anema ali nung ochimashi ken o benoka aliba ajanga party jenjang majungtsü ta karibo bilemer. Congress atemabo tanemertemi koba tashi ka Priyanka jenjang raksatsür, ibaji tongtibangba masü saka lai party atema kechi inyaktet, ta asübaji tongtibangba asütsü. 2014 küm Lok Sabha election nung Congress-i tamakok mejungi anguba den külemi assembly elections aika nunga tamakok ngua aru, ajisüaka yaküm December ita nung Congress-i state tulu asem nung BJP madak takok anguba ajanga party nung inyakertem tasüitshir aliba mapang ka nung Priyanka-i yimten nung ajemokba ajanga party nung inyakertem ano tali tasü itshidaktsüogo. India nung mezüng Ato kilonser, Jawaharlal Nehru nungi tenzüka taoba Ato kilonser Indira Gandhi, taoba Ato kilonser, Rajiv Gandhi aser Rajiv kinungtsü, Sonia Gandhi nunger mapang tashi Congress kanga merener sülen Sonia’er jabaso, Rahul Gandhi mapang party sentsü ajemer aliba mapang ka nung Priyanka-i yimtenren nung ajemoker. Ajisüaka lai yimten nung ajemokba ajanga party ajangzüktsü asü akoksatsü? Ibajibo taruba Lok Sabha election osang ajanga dang jangjatsü.