Mkg nung Anti Leprosy Day among

Mokokchung, January 30 (TYO): Mahatma Gandhi asüba anogo, January 30 nü Martyr Day anogomong nung kümshia India tesem ajaklen Anti- Leprosy day amonger, yamaji India linük den külemi Mokokchung District nunga Imlong Place, Mokokchung nung Dr. Temsuyanger ZLO leniba nung Anti-Leprosy day anogomong mongogo, ta ketdangsertem osang ka ajanga metetdaktsü.
“No stigma, discrimination & prejudice against those suffering form leprosy and those with deformaties” omen nung ajemdaker jembidang Dr Temsuyanger-i, Anti- leprosy day nükjidong ya iba tashidak indang rajema kümdaktsütsü aser iba tashidak agi shirangertem atema kanga meranga inyaksang, Mahatma Gandhi taküm tenla agutsüba anogomong amongtsü atema lir, ta metetdaktsü.
Iba sentong nung jembidang Mokokchung ADC, Manpai Phom-i, Mokokchung nung tangalen nungi arur nütsüng aika lir, anungji tangalen nungi leprosy tashidak bener arutsüsa lir, anungji nüburtem nem iba dak sendakba rajema lidaktsütsüla, ta ashi.
Pa leniba nung shilem agirtemi Anti- leprosy tenangzükba agia liasü.
Iba tashidak indang jembidang Dy. CMO, Dr. Kibangkumba-i, chitemra/leprosy tashidak ya MDT (Multi Drug Therapy) agi taneptsü angutsü, aser ibaji jangjatsü atema iba tashidak aketer ajak nem nüngdakba treatment agutsür, ta ashi.
Iba sentong ya Para medical worker, Kr. Maongrenla leniba nung agia liasü.