Daimary den nisung 9 taküm piyong tepuokdak ayutsü; NDFB-i tanü Assam ghonda 12 mokdangtsü

Guwahati, January 30 (Agencies): CBI Special Court kati Bodbarnü National Democratic Front of Boroland (NDFB) tanishir Ranjan Daimary teküm piyong tepuokdak ayutsü temerenshi agütsü.
October 30, 2008 nü Assam nung bomb atongtepa pokdaktsüba lendong atema Mongulbarnü okadaki Ranjan Daimary aitsü.
Iba ken o nungsa nisung 10 aija lir aser parnok ajak taküm piyong tepuokdak ayutsü temerenshi agütsüogo. Maneni, nisung asemi iba mapa nung shilem agiba atema senchi achiba den külemi küm pungu tepuokdak ayutsü.
Ranjan Daimary atema okatsür Manas Sarania-i ashiba agi, “ni iba oshidang agütsüba nung temulung masür kechiyong tai tonglokja alir anema kuli tejangja ka dang magütsü.”
Iba oshidang anema High Court nung ken o benoktsü, ta Sarania-isa ashi.
Iba ken o tai tonglokja alirtemji- George Bodo, Jayanta Brahma, Ajay Basumatary, Prabhat Bodo, Raju Sarkar, Khargeshwar Basumatary, Rajen Goyary, B Thorai (Baisagi), Lok Basumatary, Mathuram Brahma, Ansai Bodo aser Indra Bodo nungertem lir.
CBI Special Court-i Ranjan Daimary den nisung 9 taküm piyong tepuokdak ayutsü oshidang agütsüba anema National Democratic Front of Boroland (NDFB)-i January 31, 2019 nü ghonda 12 Assam mokdangtsü ayongzükogo.
NDFB sangdong ka nung ghonda 12 Assam mokdangtsü osang metetdaktsü.
Ranjan Daimary aija tepuokdak yura, parnoki India sorkar den yimjung olemtep aliba nung timtem ajurutsü ta NDFB-i taoba mapang shia liasü.
Bodo Women Justice Forum lennir aser Ranjan Daimary tenu Anjali Daimary-i ashiba agi, “okadak temaba ka nung küdi aitsüba aser taküm piyong tepuokdak ayutsü temerenshi agütsüba anema raratsü.”
“Iba ya teküpok okadak kati agütsüba oshidang lir. Onoki maneni raratsü. Onoki tanü agütsüba oshidang anema temaba okadak ka nung ken o benoktsü” ta lai ashi.
“Okadaki NDFB anema oshidang agütsüba ajanga yimjung olemtep nung tetsükdaktsü taludaktsü ta onoki India sorkar dang mepir. Iba ya kanga meranga ngutetba yimjung mapa ka lir aser maneni inyaka aotsüla” ta Anjali Daimary-isa ashi.
“Assam nung telungpur telok aika lir. Okadaki NDFB tanishir Ranjan Daimary aitsür süra, tanüngba teloktem nungia lennirtem aitsütsüla” ta laisa shisem.
Ranjan Daimary-i aniba NDFB teloki 2013 nungi India soskar den yimjung olemtep liyonga arur.