Arunachal nung school ka anentsü tuyuogo

Itanagar, September 11 (Agencies): Arunachal nung aliba primary school ka nung tesayur kati arishi küm tenet tetsür chanu ka tashiyim amshia raksatsüba dak sentakba nung Arunachal Pradesh nung district ketdangsertemi Geku nung aliba nija school registration certificate agienogo aser iba school shibangtsü tuyuogo.
Iba tatalokba anema nüburtemi noktakba sülen Upper Siang district administration teteyuba nung ajemdaker Deputy Director of School Education (DDSE), Yingkiong-i Geku semdanga liasü, ta ketdangser osang ka ajanga ashi.
DDSE dang Liitung Liimang Public School nung azünger kaketshir 284 pronglaji anasa aliba school tem nung tekaraba nung admission agitsü atema inyakang ta tuyuogo.
Tang tai tonglokja alisang jagi iba school nung class asem tashi social science aser computer sayur, iba den külemi pa junior boys hostel nunga warden teinyaktak liasü, ta ketdangsertem osang ajangasa ashi.
Tesayur jagi tanutsülaji raksatsüba sülen Hombar nü nüburtemi pa dak azük, school ki raksatsü aser gari ka raksaja liasü, iba sülen tesayurji hospital kati anir ao, ta Upper Siang SP (in charge) Doge Jini-i ashi.
Tesayursangji kümzüka ayutsü merangba atema school principal-a puogo, ta SP-isa ashi.