McGregor aser Khabib dang senchi achi, tenokdangba agütsür

Nevada, Aenjeti/Jan. 30 (Agencies): Nevada State Athletic Commission ajanga Mongulbarnü Conor McGregor aser Khabib Nurmagomedov na dang senchi achiba den asaya nung mapang telatet shilem magitsü metetdaktsü saka April nung asayatsü aliba UFC 236 nungbo shilem agitettsü.
Las Vegas nung taoba October ita UFC 229 asayadang Khabib-i akokba sülen raratepba mechi McGregor nem ita trok tenokdangba agütsütsü aser sen $50,000 senchi achitsü, Nurmagomedov ita teku tenokdangba agütsütsü aser senchi sen $500,000 achitsü ketdangsertemi vote agütsü.
Anti-bullying public service announcement atema film yanglua alemba nung tashiba angara Russia nunger arishi küm 30 tain, Nurmagomedov nem tenokdangba agüja aliba ya ita asem agi tajemba akümtsü.
Tenaprong tenokdangba ya 2018 October 6 nungi azüngtsü, koba anogo Vegas nung tena tsüngtepa liasü.
Aser iba ajanga McGregor aser Khabib (pai PSA ya tangokra) nati April 13 nü UFC 236 nung shilem agitsü temsüa akümtsü.
Khabib indang senchi ya pai akokba senpet sen million $2 ana anguba commission-i sota aliba nungi menok.
Iba temerenshi sangdonger mapang tatsüka lir “Tatem maka politics” ta Khabib-i tweet asü.
McGregor aser Khabib na katia iba ken o jembiba nung arua maden.
Nurmagomedov ya asaya temer Octagon alema oa nisung kar dak teka sangshiba mesüra kongshitsü merangba mechi temerenshi ya agütsü aser parnok rongnung McGregor teyariteper densema liasü.
Ireland nungi McGregor ya atsü alema tur alutsü memulungba aser Khabib’er kinunger Abubakar Nurmagomedov den tsüngtepba asoshi merenshi.
Abubakar Nurmagomedov aser Khabib indang teammate Zubaira Tukhugov, shibai iba rongrong nung shilem agi, tena ita 12 tenokdangba agütsü aser senchi sen $25,000 achi.