Kaketshir Mongpu Aruogo Tepong V

– Talitemjen Imchen.

Taoba mapang film hall nung talisa aiür asangurtem-i film kanga saputepa reprangtep. Film ji timbaka Hindi aser English oshi nung repranger asü nung aikati mangatet. Saka parnok arakzüyim aser yimyakoya nungji otsü ajak yimdangi arua angatet. Film karbo nibo anaben asemben tashi reprangogo ta masü, saka nibo terben metsüben reprangogo ta medemer yongtsü nung konang küma jembiba liasü. Ibaji dang masü film ji Mokokchung nung aliba hall tonga matudang yongi, khu abenba tata nung mener lua, Assam lima reprangersa atu. Assam lima film achir aturtem-i moko temesüng ka tsükloker, film otsü ashiba mapangji kiyongertem sentepa par kima angatep. Item nisungtemi tenyadenpongba jibo ajaki tashi angaa inyak.
Film hall nung ticket ayokba mapang karibo ticket talila alir, jenjang talila agi ayok. Iba dangji black ticket ta aja. Aika asoshi black nung jenjang tera talila agütsür aliba ji kanga anisüngzük liasü. Talisa nüknürar aser kijong lanutem asoshi. Kechiaser ticket alitsü nungtepdang, timtem ji ajak asoshi tulu liasü. Ano tebur telok karbo film reprangtsüba masü, saka züktepnüba tejangra nung rara menatsü merangera liasü.
Film nung Bruce Lee aser Chakie Chan amala (etc) indang reprangba dang masü, rarateptsü angazükdak riju balala lapok. Rarateptsü tasa balala angazüker, ibaji tendangnertem jenti. Ajakji doktsür kari lapi jara maremzüktetba putu liasü. Film reprangba mapang dakotem-i starring shilem agir mezüngmeshia merenshidangji, aier asangur aser tereprangertem jagi asatepa reprangtep. Talisa dako post dangi starring aruba mapang, hall nungji shibai arüloktsüdir pa jibo teburchi ama züngshi. Aier tajungtem-ia talisa item teburchitem jisa tenük yoka nükshitep.
NST bus ticket alidanga, anepdang ana ako mesüra asem ako nungi oa bus ticket ayokdak atatep. Aser black tickettem amshitep. Jean long pant tera teshisa agir, leather jacket semer, tamol ka mangümer moko ka tsükloka bus nung amenba ji, chuba menden nung amener ama anisüngzüka bilem. Tetsürtem nükdanga item ama sobutetertem ji tenük sünger liasü. Aser iba putu ji liasü. Kechiaser lepteptsüngtep putu süiaka, iba tera ji onok mapang tashi odang liasü. Iba den tongtipangsa, takartem-i pei dak tali yi ajem aser temetetertem-i tangar sülen anidaktsü dang meteter liasü.
Tanübo tekolok ait asü mait ta tendanger. Tetsür tebur shiba tobur junger tekolok mait lir, ajaki tajangzük (advantage) dang agir doktsür. Tesülen Tiamakala aser Tiamakasang la/pa akümer. Tobur tajung asoajen mesüra süoshi tajung agia tenüdangtsü nung renemtetba to menüngdaki akümba putu kati arua lir. Kibong akümtsü asüngdangtepdanga, tobur tajung asü masü, asoajen koda ta asüngdanger, masü saka kechi inyaker ta asüngdangtepba putu kati ayaoka lir. Tesüiba mapangbo matric pass sür masü ta asüngdangtep. Tanübo pei kechi nükmen (subject) nung puti (specialist) agia lir ta asüngdangtepba putu.
Onok mapangbo sensaker chir o takar chir na kaketkeno (education) balala angu. Kaket ajak sen agi alitsüba dang liasü. Tanü putubo kenyongi balaka. Takar makar ta masü, kaketshir kati kaket dang züngnerbo peria ngutetba putu, internet ajanga ajak ngutetba putu. Tanübo Naga nunger kaketshir o America/England nunger kaketshir ajak kaketkeno kasadang ngudagi. Nenoki dang meranga züngerbo, asüng America/England kechi putu tasenba-i ayaokdir, Naga nungera kasa jenjang nung nenoki anir ayaoka itettsü.