Pai ni anepalur

Nenok shisa buluba ajak Pa dak yuang, kechiaser Pai nenok asoshi anebalur. 1 Peter 5:7
Peteri prokshia alir Khristantem dangi pa shidi tatem nung parnok nem ozüngtem aser ozüng shia kuli agüja zülu. Nenok kati ka tsütsü ajemalu agi sobua liang. Kechiba? Tsüngremi asükümer nokdanger (t.5). Tsüngrem teka tashi tait kübok nenok sasa ajemaluang. Kechiba? Pai nenok ulutsütsü (t.6). Saksalema liang? Kechiba? Arua aliba molusongzü ama tsükchiri shiba meyoktettsü aji bushia senzür (t.8). Saka item ajak rongnung pai ozüng takang ka agütsür. Nenok shisabulu ajak Tsüngrem dak yuang! Kechiba? Kechiaser Pai na asoshi anebalur.
Tenem nung sayutsüngiba nung Yisui punguben tashi ashi, “Nenok shisa tebulu” “Kechi achitsü, mesüra kechi ajemtsü, mesüra kechi abentsü shisa tebulu. Asüng asoshi shisa tebulu (Matt. 6:25-34). Kechiba Yisui ibai lepshia ashi? Tsüngremi ozütem mesüra arem naro tebur junga sobutsüra, Pai nenok asoshi anebalu mesülima? Tsüngremi nenok nüngdak ajak agütsütsü nangzük (Fil. 4:19). Kechi arudir arung Pai asenok wabangtsü nangzük (T.Ken 91). “Tsüngrem asenok den lira, shibai asenok anema arutsü?” Asenok dak shiba alir Pa lima nung aliba dang nungi tuluba lir. Kechiba asenoki asen shisabulu Pa nem agütsütsüla? Pai asenok asoshi anebalur aser Pai asenok meimer.
Saka mezüngbuba asenoki Pa tenangzükbatem metettsüla (Pa O nung mapang endokba ajanga asenoki ibai metetter), idangji asenoki Pa Oji ochi ta amangtsüla aser tamang katetta alitsüla.
Oba, Ne tenangzükbatem asoshi Ne tenüng asanger. Ni Ne dak amang nung ni shisabulutsü kecha kuli mali. Amen.