Ramgarh election nung Cong-i takok angu

New Delhi, January 31 (Agencies): Rajasthan state kübok Ramgarh assembly by-election nung Congress-i vote tali 12,228 agi takok nguogo; Congress candidate, Shafia Zubair-i vote 83,311 angu aser BJP candidate, Suwant Singh-i vote 71,083 angu.
Ramgarh menden nung takok anguba ajanga menden 200 aliba Rajasthan assembly nung Congress Party menden 100 abensaogo.
Zubair-i vote shilem 44.77 angu aser Singh-i vote 71,083 angu, ta Rajasthan election department ketdangsertemi metetdaktsü. BSP candidate aser taoba mapang Union Minister Natwar Singh’er jabaso, Jagat Singh-i vote 24,856 ngua liasü. Ramgarh menden atema candidates 20-i toktepa liasü; iba election ya January 28, 2019 nü agia liasü.
BSP candidate ka süadokba ajanga yaküm December 7 nü Rajasthan elections agiba mapang nung iba menden atema election magitet.
Ano Haryana nung Jind by election nung BJP candidate, Krishan Middha-i Jannayak Janata Party (JJP) candidate, Digvijay Singh Chautala madak vote tali 12,000 agi takok angu. BJP candidate, Middha-i vote tali 12,935 agi takok angu, ta Jind Deputy Commissioner-cum-Returning Officer, Amit Khatri-i metetdaktsü.
Iba menden nung Congress-i Randeep Singh Surjewala-i tasembuba jenjang ngua liasü.
Arishi küm 48, Middha ya BAMS doctor ka lir; tebu asüba ajanga iba menden atema by election agitsüsa akum.
Tanü Jind nung vote azüngba mapang nung Haryana Police aser paramilitary sepaitemi ajok amshia longkak aitertem meindoka liasü. Tang tasen tentetba Jannayak Janata Party (JJP) pusemtertemi, ‘electronic voting machines (EVMs) raksaa amshiogo’ ta tai tonglokja longkak aita liasü.
Osang angazükba agi, EVMs ana indang serial number ji list nung aliba den meputepi liasü, anungji vote azüngba centre nung candidate kati ibaji ashishi. Iba osangji prokba sülen Jind jila nung party balalai longkak aitba ajanga police-i tashiyim amshitsüsa akum.