MHA tribunal-i Tripura semdangtsü

Agartala, January 31 (Agencies): Ministry of Home Affairs ajanga tentetba “Unlawful Activities (Prevention) Tribunal”-i February 2 nungi Tripura semdangtsü.
National Liberation Front of Tripura (NLFT) aser All Tripura Tiger Force (ATTF) telungpur teloktemi ozüng alema mapa inyakba atema October 3, 2018 nü Home Ministry-i telok ana küm pungu atema noktanga liasü.
Tripura nung amenoka aliba telungpur telok ana ya ozüngi memelaba teloktem ta züngshitsü kulitem bushitsü atema yaküm November 15 nü sorkari Delhi High Court Judge Suresh Kait lenisüba kübok tribunal ji tentet.
November 27, 2018 nü tribubal-i telok ana nem anogo 30 tsüngda telangzübatem agüjang ta show cause notice agüja liasü.
“NLFT aser ATTF teloktemi mulungra February 2 aser 3 anogotem anepdang 10:30 ako nung tribunal den ajuruteptsü akok. Parnoki tribunal indang Registrar den jelia osang sangoktsütsüla” ta state sorkari sangdong ka nung metetdaktsüogo.
NLFT ya March 12, 1989 anogo Dhananjoy Reang chairman ser tentet. 1993 küm NLFT nungi Reang meindok aser Nayanbasi Jamatia chairman aküm.
2001 küm ano iba telok ana küma lemsa Biswamohan Debbarma-i aniba teloki tang tongti süa mapa inyaker.
NLFT ya 1997 küm Unlawful Activities (Prevention) Act aser Prevention of Terrorism Act (POTA) kübok ozüngi memelaba telok ka ta züngok.
Taoba mapang Tripura National Volunteers (TNV) nungi telok kati July 11, 1990 nü All Tripura Tribal Force (ATTF) tentet.
Ranjit Debbarma lenisüba kübok ATTF tentet. TNV-i 1988 küm prime minister Rajiv Gandhi den peace accord ka yanglua prangpong-injang tokja temai adok saka Ranjit Debbarma-i aniba teloki TNV nungi pilar ATTF ya tenteta liasü.
1993 küm ATTF Peace Accord nung aliba ama ATTF züngsem ajak temai adok saka Ranjit Debbarma-i aniba teloki telungpur mapa maneni inyaka aru aser 2012 küm Debbarma ya Bangladesh nung apu.