Fuhrer (Modi)-i mapa crore 2 nangzük: Rahul Gandhi

New Delhi, January 31 (Agencies): National Sample Survey Office ajanga, India linük nung mapa manguba rate ji tesüiba küm 45 nung tang tamajungba, ta metetdaktsüba sülen tanü Congress Party Tir, Rahul Gandhi-i, Ato kilonser, Narendra Modi aitsü.
Twitter ajanga Rahul-i, “NoMo Mapatem! Fuhrer (Modi)-i küm shia mapa crore 2 asenok nem agutsütsü nangzük. Küm pongu sülen pai mapa adokdaktsüba report card ajanga linük takoksa jungkai adoktsür,” ta ashi.
Tesüiba küm 45 nung mapa manguba rate tang timtiba aser 2017-18 küm kija nunga lanur mapa mangur crore 6.5 lir.
Congress-ia twitter ajanga, “Küm pongu kija nung Ato kilonser Narendra Modi-i linük rongsenkettsüng raksatsüogo aser tesüiba küm 45 nung mapa manguba rate tang timtiba. Modi, India lanurtemi nü dang langka asüngdangner, Mapatem koma lir?,” ta metetdaktsü.
National Sample Survey Office’s (NSSO) periodic labour force survey ajanga ashiba agi, tesüiba küm 45 nung linük nung mapa manguba rate timtibaji 2017-18 küm shilem 6.1 lir, ta metetdaktsü.
Kasa osang ajanga ashiba agi, 1972-73 küm nungi tenzüka mapa manguba rate timtibaji 2017-18 küm lir.
Kasa osang ajanga ashiba agi, 2011-12 küm India yimtsüngtem nung lanur tebur (arishi küm 15-29) mapa manguba rate ji shilem 5 liasü ajisüaka 2017-18 küm nungbo mapa manguba rate shilem 17.4 kümogo.
Ano yimtsüngtem nung kasa züngar tetsürtem mapa manguba rate ji 2011-12 küm shilem 4.8 aliba nungi 2017-18 küm nungbo shilem 13.6 kümogo.