Meghalaya minister aser MLA nati CAB anemba sentong nung aden; MDA sorkar nung BJP MLA temi party toktsütsü amokmerener

Shillong, January 31 (Agencies): Nisungtemi meimlai lia Meghalaya Democratic Alliance (MDA) nung Minister ka aser MLA kati Citizenship Amendment Bill, 2016 anema lungkak aitba sentong nung shilem agi.
Bodbarnü Shillong nung agiba sentong nung adenertemi CAB ya Rajya Sabha nung agizükra, lungkak tesashiba nung aittsü ta metetdaktsü.
Lungkak aitba sentongji Khasi Students Union (KSU)-i Motphran nung ayongzüka agidang Urban Affairs Minister, Hamletson Dohling aser State Planning Board Chairman, Lambor Malngiang na aden.
Iba sentong dang ‘People of Meghalaya opposes the Citizenship (Amendment) Bill, 2016′ ta jaloktsü.
Osang ajanga ashiba agi, Dohling aser Malngiang naprongi sentong nung o jembi.
CAB ya Act ka kümra Northeast kübok state tem timtemtsü, ta Dohling-i ashi.
Paisa ashiba agi, MDA sorkari taküm April tashi nung Ri Bhoi district nung entry-exit points yanglutsü.
Külen, Malngiang-ia Bill ya BJP-i vote angutsü atema inyakba mapa ka lir ta ashi.
Citizenship bill ya Meghalaya aser northeast state temi Bangladesh nungi nisungtem anir aruba taxi ka lir, ta Malngiang-isa metetdaktsü.
Sentong nungsa KSU president Lambokstarwell Marngar aser NESO chairman Samuel B Jyrwa naprongi Rajya Sabha nung CAB agizükra rara adoktsü ta kümdangtsü olentem jembi.
Jyrwa-i Meghalaya nung lisopurtem dang Bill anema longjemer noktaktsü ayongzük.
Iba Bill ajanga lisopurtem maitsü raksatsütsü, ta paisa shisem.
Brihostibarnü Meghalaya kübok South Shillong MLA Sanbor Shullai-i ashiba agi, BJP-i Rajya Sabha nung Citizenship Amendment Bill 2016 agizükra pa den Cabinet Minister AL Hek naprongi BJP toktsütsü.
Meghalaya nung CAB anema lungkak aitba mapang ka nung Confederation of Hynniewtrep Social Organisations (COHSO)-i tanü Meghalaya nung Inner Line Permit (ILP) mapa tenzüktsü atema takhangba agütsüshi.
“CAB anema nübortemi ola adokba osang sangoktsütsü atema ni Prime Minister den ajuruteptsü atema mapang agütsütsüla. Pai pa senti mapang agüja onoki ashiba onüktem angara, iba sülenji onoki NDA sorkar nung adentsü mesüra madentsü telemtetba agitsü” ta Shullai-i ashi.
“January 11nü PM dang Meghalaya aser Northeast India ajunga CAB kübok medendaktsütsü atema memorandum ka züluogo saka tang tashi telangzüba kecha mangu lir. Parnoki ni züluba memorandum ji akhüm metsübur aser iba atema ni mepelar. Aji agi yashi nikongtsütsü onoki rongdak senden ka amen aser idangji BJP nem telangzüba agütsütsü atema maongka ka agütsütsü lemtet. Parnoki iba amaji meinyakra kü den AL Hek napongi BJP nung madentsü aser assembly nung independent candidate ama shilema agitsü” ta paisa metetdaktsü.
Brihostibarnü COHSO-i Students’ Field, Jaiaw nung CAB anema sentong ka agidang nisung meyirjang aikati shilem agi.
Parnoki ‘No to CAB, Yes to ILP’, ‘Go Back Bangladeshis’ aser iba mesükba tezülubatem amer lungkak ait.