Kobi melii Air Force-i Rafale Jets agizüktsü: Ram Nath Kovind

New Delhi, January 31 (Agencies): Indian Air Force tashi itshitsü atema parnoki new generation ultra-modern Rafale fighter aircraft agizüktsü asoshi renemdar, ta tanü linük Tir, Ram Nath Kovind-i metetdaktsü.
Sen crore aika jenjang Rafale deal dak sendakba nung opposition party temi sorkar aitsüba mapang ka nung Tiri iba o ya jembiogo.
Budget senden jakdang Parliament House anaprong külem senden nung jembidang pai, linük defence nüngdaktem khen atema danga sendokra ibaji ajanga tang aser tarutsü linük jenjang raksatsü, ta ashi.
Paisa, defence sector nung yaküm sign asüba tezüngzükteptem, defence osettem tasen aliba aser ‘Make in India’ kübok yanglubatem ajanga defence sepaitem tasü itshidaktsüogo, ta ashi.
“Küm aika sülen taruba itatem nung new generation ultra-modern fighter aircraft Rafale agizüktsü atema Indian Air Force renemshir, aser ibaji ajanga raraba tsütsü tashi itshitsü,” ta pai ashi.
2016 küm Pakistan arrtsülen ‘surgical strikes’ aoba dak sendakba nung Tiri, “Arrtsülen aliba kiralongrar posts amakba ajanga India-i asalentong tasen sayuogo,” ta ashi.
India-i linük ajak den tesendaktep tajung ayutsü meranger, ajisüaka tayongzükba ajak koktettsü atema linük tashi itshitsü nüngdaker, ta pai ashi.
Parliament nung Tiri jembiba onük aija Congress-i, sorkari tamakok anguba atema tatemtsü o jembiogo aser yazü tenangzükbatem atema tenüng tajung agitsü meranger, ta aitsü.
Osangbenertem senden ka nung Congress otongdar, Anand Sharma-i, “Sorkari küm pongu nung inyaktetbatem tanü Parliament nung Tir onük ajanga metetdaktsüogo. Yazü tenangzükbatem atema sorkari Tir ajanga tenüng tajung agitsü asoshi merangba ya kanga tia maka,” ta aitsü.