Mon nung Sparsh Leprosy Awareness sentong agi

Mon, January 31 (TYO): January 31, 2019 nü Mon Deputy Commissioner indang Conference Hall nung National Leprosy Eradication Programme (NLEP), Department of Health & Family Welfare-i ayongzüka Sparsh Leprosy Awareness Campaign agiogo, ta ketdangsertem osang ka ajanga metetdaktsü.
Iba sentong nung okila jembidang DVBO NVBDCP, Dr. Limatula Aier-i, leprosy (chitemra) tashidak ya menatepba tashidak ka lir, aser nisung ka dak nungi ka dak iba tashidak menazüktsü atema mapang talangka agir; leprosy temaitsütemji kanga tesülen ang adoker, ajisüaka kera tashidak putetba aser anepaluba ajanga taneptsü nguteter, ta metetdaktsü.
Leprosy samatsütsü programme ya 1995 küm tenzüka liasü aser 2001 küm Nagaland nung iba tashidak samatsü, aser 2005 küm India tesem ajungalen samatsü, ta laisa metetdaktsü.
Kasa sentong nung SDO (C) Sadar Mon, Chumlamo Humtsoe-ia jembia liasü.
Iba sentong ya DPM Mon, Y. Bonnie Konyak leniba nung agi aser iba sentong nung adener züngsemtemi Sparsh Leprosy Awareness Campaign tenangzükba agia liasü.