Maj Gen Manvendra-i Zunheboto nung Govt. College semdang

Dimapur, September 11 (TYO): September 10 nü Zunheboto nung YSM, SM, IGAR (N), Maj Gen Manvendra Singh Jaswal-i Government College nung Sema kaketshitem den jembia liasü, ta tanü Assam Rifles sangdong ka ajanga metetdaktsü.
Kaketshirtem aser tesayurtem den jembidang General Singh-i, lanurtem tajungtiba nung anitetba aser linük yanger ba nung society-i shilem tulu agir, ta ayongzük.
Kaket azünger ka, aser kaket zülur ka ama pai kaket pezü züluogo aser pai kaketshirtem dang tang tensa nung terenlok aser loktiliba indang lemsatepa liasü.
Paisa puti otsü tsütsülen nungi, shisaliok, Naga nunger sobaliba aser senmang takar indang jembi, aser kaketshirtem o tesayurtemi pa o junga agizükogo.
General Singh-isa, NSCN-K anema operation aoba manentsü, ta ashi. Ajisüaka NSCN (K)-i India sorkar den Ceasefire atema melungtepra pai NSCN-K tongti lenirtem den yimjung nung alitsü melunga lir, ta ashi.
Singh-i kaketshirtem ayongzükba sülen kaketshir aser tesayurtem den shisa lemsatepa liasü. Singh-isa pai züluba kaket pezü College nem agütsü.
College nung HOD (English) aser Assistant Professor, T Chandrashekran-i tepela o lemsatepba den külemi district nung degree college ka dang aliba aser iba college indang infrastructure lemsatepa liasü,.
Paisa, Assam Rifles/Army-i Military Civic Action/Operation Sadbhavana Project balala benoka inyakba atema pelaba shisem.
Iba sentong nungsa Kohima nung Army Recruitment Rally alitsü sentong aser Online Registration ajanga form fill up asütsü atema kaketshirtem nem phamlet lemja liasü, ta kasa sangdong ajangasa metetdaktsü.