Samaro kentener aser Kohima Ao Arogo dangi Mr. Alokba shiti

Khrista nung kü temeim Samaro kentener aser Ao Arogo Kohima, nenok ajak dangi Yisu temeim salem ni Alokba ajanga abener. Samaro kentenertem, nenoki adenba kensep balala ajanga nüburtem ajak temoatsü tulu ngua angar. Oda tanga kentem dak alia Christmas kensep nung YIMLIBILEMA OBA YI TEJEM, kidang Ojala ajepber ta nenoki adenba ken yagi tebutem aika temulung nung Zing ta kongshia joko Yi tu majemer, saka tebutem yi majemba tuagi joko tetsütem yi ajemer aser dangbo tetsüi yi ajemerji jala dena ajemer. Anungji ano nenok Christmas kensep adoktsü lira Vol-2 nungjibo”YIMLIBILEMA OJA, YI TEJEM” Kidang Obala dang masü, tangbo onoka dena ajeber ta iba kensep tasenba nungji aden nungbo ajungtsü ta shidanger.

Ano Kohima Ao arogo dang kangasa peleba kaji asen arogoi küm ishika tejaklen nungi Ao arogotem nung Tsüngremi shisa tajung agüja FATHERS SCHOOL katsüba iba sentong tajung agi tebutem aika Tsüngrem temeim angateta kibong nung kinungtsü koma tenzüktsü, tesayuba tajung agütsüba ajanga tebutem temulung melenshir kinungtsü kübok Fathers school nung angazükba toh temulung nung yur tenzüka alir, saka tetsütem karbo joko kinungboi tenzükba agi kinungbo kübok tu malira lir, anungji akok nungbo tarutsü nung ano MOTHERS SCHOOL-a katsü nungbo ajungtsü südi ta iba shiti ajanga nenok den lemsateper. Salem.

Lilir : I. Meren Lemtur, Tzüdikong Town.