NE nung CAB anema lungkak aitba manener ; Assam nungbo mangsa lungkak ait

Guwahati/Tura/Itanagar, February 1 (Agencies): Hokolbarnü tebur asemi Assam Secretariat anasa Citizenship (Amendment) Bill anema mangsa lungkak ait.
Lungkak aitertemji sepaitemi anien ta police-i ashi.
Lungkak aitertemji Sonaram Das, Harakanta Das, Bubul Deka aser Naren Kakoti nungertem ta jangjaogo aser police-i parnok dak kombol abenloktsü aser Khanapara-i anir ao.
Parnoki citizenship bill agientsü aser centre sorkar anema yimyimtem ayim.
January 8 nü Lok Sabha nung CAB agizükba sülen nung North East ajungalen lisopurtemi lungkak aitba manener.
All Garo Hills Joint Action Committee (AGHJAC)-i January 30 nü Non Cooperation Movement takok ngua agiba sülen maneni Citizenship Amendment Bill, 2016 anema lungkak aitba mapa tulu inyaktsü ta metetdaktsüogo.
“Ghonda 11 NCM ajanga nübortemi CAB tali angatetogo. Iba osang ya Garo Hills kinük ajakleni sangoktsüogo. Iba Bill ya NE nung alirtem atema lendong keta lir aser iba jagi onok dang Bill anema lungkak aitba manentsü ajungmesogo” ta AGHJAC convener, Balkarin Marak-i ashi.
CAB meyipa magien tashi onoki anema noktaktsü. Onoki Garo Hills nung alirtem dang weekly market ung CAB anema mapa inyaktsü aser onoki posema nungittsü ayongzüker, ta AGHJAC sangdong ka nung metetdaktsü.
Shillong nung anogo ananü ‘Rally’ nunga AGHJAC-i posema yaritep.
Maneni, Tripura nunga CPM state committee-i Hombarnü CAB anema lungkak aitba sentong ka agitsü.
“Centre sorkari lokti nung telemsa adokdaktsütsü atema citizenship bill mezüng benoka mapa inyaker. Iba bill ajanga northeast nung alir teimba ka temulung yirutsüogo. BJP-i poltics tsütsü tajangzük angutsü atema northeast nung tensa raksatsütsü meranger” ta CPM state secretary Goutam Das-i ashi.
“Külen, NRC maparen tenüng nung ozüng alema arurtem jangjar aser külen, sorkari citizenship bill tenüng nung tamangba yimsü ka nem senso agütsütsü meranger” ta Das-isa shisem.
Linük Temzüng nung tamangba yimsü lemdanga mamshitsü lateta lir anungji sorkari iba bill tangsa tang meyipa agitsüla, ta paisa metetdaktsü.
CPM-i linük ajungalen amendment bill anema lungkak aittsü ayongzükogo. Tripura nunga Hombarnü iba bill anema lungkak aitba sentong ka agitsü, ta party osang ajanga ashi.
Bodbarnü Khumlung nung Tripura nung lisopur political party temi citizenship bill anema lungkak aitba sentong tulu ka ayongzüka agia liasü.
Khumlung ya Tripura Tribal Areas Autonomous District Council headquarters lir aser BJP sorkar den yaritepba IPFT züngsemtema iba sentong nung aden.