Temeim tatishitsü ka

Asenok ano temenen pur alidang Tsüngremi Pa temeim asenok dang, Khrista asenok asoshi asü. Rom 5:8
Paul mapang Tsüngremi nüburtem dang koda ka meim? Taoba mapang aser tang mapang Pai nübur dang kasa meimer. “Kechiyong Tsüngremi alima odang meim nung Pai Pa chir agütsü…” (Yn. 3:16). Pai tangar dang tali Yihuda nunger memeim, kechiaser maneni Pai ashir, “shibaisa amangdir…” “Shirnok temejeptokertem lir” ta pai mashi mesüra “Shirnoki mapa tajung inyaker” ta mashi; Pai ashi “shibaisa” tajungtiba shilem parnok temenen pur tem alidang, Khrista parnok asoshi asübaji lir. Ibaji Pa temeim sayuba tematibaji lir. Shibai ibaji inyaktsü? Pauli ashi, temeshi nisung ka asoshi kari inyaktsü akok, saka ya bilemtettang, “Temeshiba shinga mali” (Rom 3:10).
Iba ochi ya iba mapang alirtem asoshi koda tongtipang liasü tanga asenok asoshi tongtipang lir. Tsüngremi tamangertem meimer aser parnok tamanger mekümi aliba mapang Khrista Kibur aser Kümtetdakba ta mamangi aliba mapang Khrista parnok asoshi asü. Ibai asenoki teti bilemtettsü ochi O lir. Pai asenok meimtsü asenok tetemsü masü. Pa temeim asoshi asenok tetemsü masü. Khristai asenok dang koda tajungtiba tatishitsü sayu. Asenok madak temeimtsü maketba nüburtem lir asü? Samaria nungbaji pa sempar dang meimba ama asenoki asen dang sempar dang pei ama meimtsüla. Asenoki asen tsükchirtem dang meimtsüla aser Yisui melaba ama asenok rishikangshirtem asoshi sarasademtsütsüla (Mathi 5:14). Parnok temenen pur alidang asenoki asen temeim parnok dang sayutsüla, temang asütsü menüngdak saka peiji südakja parnok dang temeim sayutsüla.
Yisu, ni medemsüba temenen nisung ka asoshi Na asüba atema Ne tenüng asanger. Ni kü tepela sayutsüba lemangji tangar dang meimtsübaji dang lir. Amen.