Meghalaya nung mejangjaba nisungtemi tekülem ki raksatsü, sen auya

Tura, Tsüklai/Feb. (Agencies): Meghalaya indang West Garo Hills district kübok mejangjaba nisungtemi Bodhbarnü tekülem ki ka raksatsü aser sen lakh ka dak tali auya.
Bodhbarnep nisung telok ka tejak nembanger arua tenlaki telung nung alir putir ana yirutsü.
“Anepdang 1:00 ako meta mejangjaba nisung 20 shi Dominic Savio Mission-i power cut mapang aita Rev Fr Thomas John aser Daniel M Sangma na alena yur yindong agi züka merenshi,” ta Superintendent of Police MGR Kumar-i ashi.
“Iba sülen parnoki tenlaki raksatsü aser sen lakh 1.25 den smartphone ana bener jena ao,” ta police ajangasa ashi. Iba maparen dak sendakba nung FIR ka benoka lir aser police tanishir telok kati bushisüngdang südagi.
Taoba mapang nunga ita ka tsüngta East Garo Hills kübok Dawagre tesem nung, South Garo Hills kübok Chokpot tesem nung aser West Garo Hills kübok Dalu tesem nung kasa rakzükraktemba ataloka lir aser iba mapa ya nisung telok kati dang inyaker alitsü südi, ta police temi temulung malemer.
“Dominic Savio Mission nung ketdangsertemi FIR nung shia aliba agi, iba arogo nung putir John Mathias M Marak-i item nisungtem ya ngua ola agütsü aser iba sülen parnok ya jena ao,” ta Kumar-i ashi.
Garo Hills nung tawa tekülem kidang iba ama atalokba yimya ka kasa dang lir, ta SP-i ashi.
Item mapa tamajung inyakertem aputsü asoshi ketdangsertemi kanga meranga inyakdagi aser mejangjaba nisungtem ya tekeraba nung aputsü, ta paisa ashi.