Dimapur ya model district ka kümdaktsütsüla: Dimapur DC

Dimapur, February 01 (TYO): Dimapur Deputy Commissioner, Kevekha Kevin Zehol-i, Intensive Pulse Polio Immunisation (IPPI) programme ya missionary mapa ka ama kanga nendaka inyakba ajanga Dimapur district ya tatishitsü tajung agutsüba district ka kümdaktsütsüla, ta ayongzük.
State nung IPPI aser National Deworming day agitsü aliba dak sendakba nung tanü Dimapur district Task Force Committee senden amenba mapang nung DC-i, iba programme nükjidong ataloktsü atema polio drops agutsütsüpurtem health workers nem training junga agutsütsü nüngdak, ta ashi.
Kasa senden nung District Programme officer RCH/UIP, Dr. Rebecca-i, IPPI ya March 10, 2019 nü agitsü aser iba mapang nung arishi küm 0-5 tanurtem nem polio agutsütsü, ta metetdaktsü.
Laisa, medical department Dimapur district kübok block 6 nung supervisor 102 densema team züngsem 2076-i tanurtem nem IPPI agutsütsü, aser takümbo IPPI round ka dang agitsü, ta metetdaktsü.
Iba dak alia lai, National Deworming day February 8, 2019 nü agitsü, aser iba mapang nung arishi küm 10-19 tsüngda tainlonglongtem nutritional impairment, anaemia, nausea, vomiting, weakness atema mozü agutsütsü ta ashi.
Dr. Rebecca-i, National Deworming day anogomong nung kei mozü machirtem nem February 14 nü maongka khen agutsütsü, ta ashi.
Senden nung Project officer, UNDP-i vaccines anepaluyim, rizünga ayubayim, temperature regulation indang metetdakja liasü. DCs conference Hall Dimapur nung ayongzükba senden nung IPPI programme official partner- Rotary club densema stakeholders ajak dena liasü.