Myanmar Army-i NSCN-K headquarters atsünga agi

Guwahati, February 1 (Agencies): Myanmar Army-i National Socialist Council of Nagaland-Khaplang (NSCN-K) indang headquarters atsünga agiogo.
NSCN-K indang headquarters ji Myanmar kübok Sagaing Region nung Naga Self-Administered Zone nung lir.
NSCN-K Central Executive Committee züngsem U Kyaw Wan Sein-i ashiba agi, onoki yimjung maparen inyakba nung timtem majurudaktsütsü atema ozü sepaitem anien aser Myanmar Army nem headquarters agidaktsü.
North-West Command kübok Hkamti District tactical commander-i anir battalion 6 nungi sepai 400-i Mongulbarnü Ta Ga yimtsüng nung NSCN-K indang headquarters atsünga agi, ta paisa ashi.
“Onoki parnok den khatep asübo onok aser Myanmar sorkar tsüngda yimjung maparen nung tetsükdaktsü alula. Anungji, onoki parnok aitdaktsü aser onoki toktsür ao” ta U Kyaw Wan Sein-isa metetdaktsü.
NSCN-K indang Peace Committee nung züngsemtem aser prangpong mabenba züngsem kar headquarters nung lir, ta paisa shisem.
Naga Self-administered Zone Leading Body nung Executive U Kasi Rang-i ashiba agi, “kechiba Myanmar Army-i sepaitem NSCN-K headquarters-i yok’ar memetet.”
“Parnoki atsünga agi ta meshitettsü. Iba mapang yiruyibong mesüra tasüba kecha maliasü” ta paisa ashi.
Külen, North-West Command otongdar Colonel Than Naing-i ashiba agi, “Onoki mapang shitak nung osang metetdaktsütsü. Iba dak sendakba osang ni ashitsü tashi agüja mali, saka onoki parnok indang headquarters atsünga magi.”
April 2012 nung NSCN-K-i Myanmar sorkar den regional-level truce ka nung sign asü. Onoki headquarters tangaleni belentsü sentog kecha mali, kechiyong iba headquarters ya anatsülen mulungtepa tentetba lir, ta Kyaw Wan Sein-isa ashi.
Myanmar sorkari NSCN-K dang Nationwide Ceasefire Agreement (NCA) nung sign asütsü ayongzüka arur saka India kübok northeast aser Myanmar nung aliba Naga nungertem ajak adenba telemtetba ka nung ang sign asütsü ta tekong meranger.
Tang NSCN-K nung chairman ji asür S.S Khaplang’er tanük Yung Aung lir.