NDA dang nungibo opposition nung tetsür lenirtem tajungba lir: Yashwant Sinha

New Delhi, February 02 (Agencies): Taküm April-May ita nung agitsü aliba Lok Sabha election nung Ato kilonser, Narendra Modi-i tanaben takok angutsü atema tayongzükba tongti rongnung yimtenren nung tetsür asem alitsü.
January ita nung Nehru-Gandhi kibong nungi Priyanka Gandhi Vadra-i yimtenren nung ajemokogo; Congress-i India nung nütsüng timba aliba state aser Lok Sabha menden timba aliba state, Uttar Pradesh nung la General Secretary shimogo.
Ano yimtenren nung tetsür anaji Trinamool Congress tongti aser West Bengal, Mamata Banerjee aser taoba mapang Uttar Pradesh Chief Minister, Mayawati na lir. BJP-i aniba NDA sorkar atsüngdoktsü atema Mamata aser Mayawati nati opposition party tem lokteptsü merangdar.
Taoba mapang Union Finance Minister aser BJP toktsüsang arishi küm 81, Yashwant Sinha-i, “NDA dang nungibo opposition nung tetsür lenirtem tajungba lir, anungji parnoki voters, talisa tetsürtem atsüer arutettsü,” ta ashi.
Yaküm assembly election nung BJP-i state asem election nung tamakok anguba dak sendakba nung Sinha-i, “Parnok (NDA) kanga shisabulutsüla, kechiyong parnoki linük tiyongtsü nung aliba Hindi oshi jembiba state tongti asem nung tamakok nguogo,” ta ashi.
Arishi küm 47, Priyanka Gandhi-i o kanga tsüngro songa jembiteter aser voters den sendaktepa jembiteter, aser nisung aikati la kanga sapur.
Ano tanga tetsür ana rongnung kaji arishi küm 63, Mayawati lir, aser taoba ita lar party Bahujan Samaj Party (BSP)-i Samajwadi Party den loktepogo. BSP ya Dalit nungeri pusemer aser SP-i lower castes aser Muslim nunger vote aika angur.
Ano külen taoba mapang anaben tashi Railway minister inyakla aser WB chief Minister arishi küm 64 Mamata Banerjee lir. Taoba ita lar party-i Kolkata nung BJP anemba rally ka ayongzük, aser iba rally nung nisung meyirjang aika dena liasü.
Tesüiba küm pezü nung Ato kilonser, Narendra Modi-i tetsürtem atema mapatong tajung aika benoka inyakogo aser pai aniba cabinet züngsem 26 nungi tetsür-a trok lir, ajisüaka tashi aika pai amshir.
Uttar Pradesh nung Congress-i BSP aser SP na den loktepnüa liasü saka iba teloktep nung Congress bo sendok. Ajisüaka Congress Tir, Rahul Gandhi-i, party-i SP-BSP teloktepji akokba tashi yaritsü, ta sangdongogo.