Cong-i ashishiba magizüki Centre-i CBI Director sangdongtsü

New Delhi, February 02 (Agencies): Congress Party lenir, Mallikarjun Kharge-i ashishiba magizüki kobi melii Centre sorkari CBI Director tasenba tenüng sangdongtsü, ta tanü osang ka ajanga metetdaktsü.
Yashi high-powered committee tanabuba senden amendang sorkari CBI Director atema tenüng kar benokogo, ta osang ka ajanga metetdaktsü.
Ajisüaka item tenüngji Lok Sabha nung opposition lenir, Kharge-i magizük. High-powered committee nung züngsem asemji Ato kilonser, Narendra Modi, Kharge aser Supreme Court judge ka lir.
CBI Director menden atema benokba tenüngtemji 1984 batch Senior IPS officers- Javeed Ahmed, Rajni Kant Misra aser S S Deswal nunger lir, ta osang angazüker.
Ahmed ya Uttar Pradesh cadre ka lir aser tang National Institute of Criminology & Forensic Sciences nung tongti lir.
Ahmed nunger batch Misra ya Border Security Force (BSF) nung tongti lir aser Deswal ya Haryana cadre ka lir aser Indo-Tibetan Border Police (ITBP) nung Director General lir.
“Iba senden nung tatembang telemtetba ka dangi maru. Iba senden nung telemtetba magitet,” ta ketdangser kati metetdaktsü.
Yashi Supreme Court (SC)-i, interim CBI director dang shimbaji SC-i magizüker, anungji Centre-i tangsa regular CBI Director ka shimtsüla, ta metetdaktsüba sülen tanü item osang ya angazüker.
CBI Director menden ya taküm January 10 nungi tazüng lir. Director Alok Verma aser Gujarat-cadre IPS officer Rakesh Asthana na tsüngda ochimashi tai tongloktsütepba sülen sorkari tenaprong nung leave aguja liasü aser iba sülena mangatettep aiben adoka Verma iba menden nungi agein.
Verma anendaktsüba sülen M Nageswara Rao-i interim CBI Director inyaka liasü.
Yashi Ato kilonser kidang committee sendenji ghonda ka dak tali amen, aser iba senden nungji Chief Justice Ranjan Gogoi aser Congress lenir Kharge na aden.
January 24 nü senden amenba sülen osangbenertem den jembidang Kharge-i, “Sorkari ketdangser tenüng 70-80 benok. Iba nungji parnok mapatem osang tejangja maliasü. Künati (CJI Ranjan Gogoi) parnok dang nüngdakba osang tejangja agujang ta shiogo. Taruba hopta senden ka ayonga amentsüa akok,” ta metetdakja liasü.