Ali Europe nung oa asayatsü nükjidong ayur

Tsüklai/February 2, 2019 (Agencies): Asian Cup akokba team Qatar nungi asayar Almoez Ali-i taküm iba asayamung nung küm 23 tashi Iran nunger asayar Ali Daei-i goal timtiba agütsüba record bener aliba raksatsüogo, aser 2022 World Cup asoshi pa ya asayar tongtibang ka asütsü.
Ali-i iba asayamung final Japan den Zayed Sports City nung asayaba mapang pa asoshi goal 9buba idakja otsü tasen ka yanglyuogo. Parnoki iba asaya goal 3-1 agi koka liasü.
Pai final nung tekolak alema tur goal tajung ka idaktsüba ajanga par telok nem takok agütsüba dang masü saka pa iba asayamung Player of the Tournament aser top goalscorer award ngua liasü.
“Ni goal idaktsütsü ta bilema liasü saka teku idaktsütsü ta mimla,” ta pai osangbener dang ashi.
“Ni goal ka ana idaktsütsü ta bilem saka ozü team-i kü nem teyari aika agütsü kechiyong parnoki kangajunga defend süogo aser onok goal ka dang achi, anungji ni goal magütsüra ni asoshi maksü süla.
“Ali Daei indang record ajangtetba ya kü asoshi kanga jangratemtsüka lir,” ta paisa ashi.
Ali shiba Qatar indang Aspire Academy nungi graduate asü, pai ashiba agi pa European club ka nung oa asayaner.
“Ni Europe nung oa asayaner kechiyong Qatar dang masü Asia nung onok indang league nung team tem ya tashi mait aser aji World Cup mapang angur. Parnok talangka asayaa metuteter aser yakta tsükadoker,” ta pai ashi.
“Ni Europe-i oa asayatsü aser angazüker arua World Cup nung asayatsü imlaa atar,” ta paisa shisem.