Davis Cup: Italy team-i 3-1 agi India madak takok angu

Tsükali/February 2, 2019 (Agencies): Davis Cup, India aser Italy na tsüngda asaya Italy-i 3-1 agi koka tang mezüngbuba Davis Cup World Finals tongtetogo. Asaya mezüngbuba anogo singles rubbers ana mekoki 0-2 aliba mapang tarep asayar Rohan Bopanna aser Divij Sharan nati 4-6, 6-3, 6-4 agi Simone Boelleli aser Matteo Berrettini na koka India nunger nem timla agütsü.
Ajisüaka Calcutta South Club nung reverse singles mezüngbuba asaya nung world number 37 Italy nunger asayar Andreas Seppi-i 6-1 6-4 agi Prajnesh Gunneswaran koka asaya pongububa asayatsü nüngdak makai aküm.
Iba asaya makokba sülen jenjang 19buba nung aliba India team taküm küm tatemlen Zone Group nung tokteptsü. India non-playing captain Mahesh Bhupathi-i ashiba agi, “onok ajaki tamang kaa liasü saka onoki yashi point angutsü nüngdaka liasü. 0-2 ta mokoki aliba nungi meyiper kokyonga aotsü ya mapa tasak.”
Italy team nung top-60 nung alir asayar asem lir saka India team nung top 100 nung alir asayar ka danga mali. Bhupathi-i ashiba agi, iba tamakok sülen India nungeri tensa asadangtsü nüngdaker. “Asenok saksalemtsü nüngdaker. Madrid list (linük 12) sangdongba sülen parnok rongnungi top-100 tema nung alir asayar ka danga ali maliar reprangdangner. Auh Madrid nung oa asayatsü kanga jangraa liasü saka nai sayatenya ka atema imlaa melitettsü,” ta pai ashi.
Mezüngbuba round bye nung ataba sülen India team-i Asia/Oceania Zone Group I nung China 3-2 agi koka World Group play-offs-i ai. Kraljevo nung World Group play-offs nung India team Serbia-i 4-0 agi akok aser iba sülen Italy den asayatsü lemzük, shirnok France-i 1-3 agi koka liasü.
“Parnok ajak den külemi inyaktsü jangratemtsüka liasü. Prajnesh-i küm ana tsüngda jenjang 300 nungi 102 tashi tongtetogo. Pa tejakleni aotsü timla lir,” ta Bhupathi-i ashi.
Italy aser India na tsüngda tang tashi nung trokben asayaa lir aser Italy-i ponguben kokogo.
November ita Madrid nung final nung 2018 champions Croatia, runners-up France, aser semi-finalists Spain aser USA nunger den asayatsü atema qualifier 12 rongnung Italy team densemogo.
Team 18 asayatsü aliba final atema Great Britain aser Argentina na nem wild card agütsüogo. Iba asayamung ya telok trok küma lemsar asayatsü kong team asemsem alitsü. Telok ajak nungi takoker aser runners-up tem rongnung tajungtiba team ana quarter-finals asayatsü aser iba sülen semi aser November 24 nü final asayatsü.