Smriti ICC WODI ranking nung No.1 kümogo

Tsükali/February 2, 2019 (Agencies): New Zealand den mezüngbuba ODI ana tashi nung kanga junga asayaba sülen India opening batswoman Smriti Mandhana tawa sayaba ODI women’s batters rankings nung temaba jenjang tongtetogo, ta ICC-i Honibarnü sangdongogo.
New Zealand den ODI asem asaya nung Smriti-i asaya ka nung century ka aser tanabuba nung out mesüi run 90 yanglu. India team-i iba asaya 2-1 agi koka liasü.
Batters’ rankings nung la jenjang asem temaleni tua temaba jenjang tongtetogo. La sülen tanabuba aser tasembuba jenjang nung Australia tsür Ellyse Perry aser Meg Lanning na lir. New Zealand captain Amy Satterthwaite jenjang 10 tashi atua pezübuba nung lir.
Indian captain Mithali Raj shiba jenjang ka asetzüka luogo la jenjang pongububa nung lir.
International Cricket Council (ICC) sangdong ka ajanga ashiba agi, Smriti-i one-day format nung kanga junga asayaogo aser la iba jenjang atongtsü tetemsü.
2018 küm nungi tenzüker ODI 15 asayaba nung Smriti-i century ana aser half-centuries ti yangluteta lir.
Smriti den opening partner Jemimah Rodrigues-a jenjang 64 nung aliba 61-i atuogo. 2018 küm March ita mezüng asayaba sülen arishi küm 18 tain asayari tang tashi nung ODI 7 dang asayaa lir ajisüaka Napier nung mezüngbuba ODI asayaba mapang half century ka yangluba sülen la jenjang tajungba kümogo.
New Zealand captain Amy jenjang temabai atuba ya India den asaya nung half-century ana atonga yangluba aser taoba ODI asaya 10 tashi nung half-century 4 tashi yanglutetba ajanga lir.
Amy den külem asayar Suzie Bates shibai Hamilton nung India den asaya nung half-century ka yangluba ajanga par team takok dangi ani, la jenjang ka temaleni tua jenjang 6buba tongtetogo.
Lizelle Lee (No.7), Tammy Beaumont (No.8), Stafanie Taylor aser Chamari Athapaththu nungeri top 10 abensatsür.
Bowler tem rongnung temelenshi kangabo mali saka India tsür rongnungi spiner asem; Deepti Sharma, Poonam Yadav aser Ekta Bisht nunger asoshi osang tajung lir.
Poonam aser Deepti na jenjang pongungu tejakleni tua jenjang 8 aser 9buba nung lir. New Zealand den asaya nung Poonam-i wicket 6 agi aser Deepti-i wicket 4 agi. Kasa mapang nung Ekta-i kasa series nung wicket pongu agia jenjang teku tashi tejakleni tua jenjang 13buba nung lir.
India tsür rongnungisa fast bowler Jhulan Goswami jenjang 4buba nung lir aser la jakdang Pakistan tsür Sana Mir, Australiatsür Megan Schutt aser South Africa tsür Marizanne Kapp nunger lir.