Nagaland Baptist Church Council 82Buba Annual Council tembangogo

Dimapur, Tsüklai/Feb. 04 (TYO): “Knitted Together in Christ” onem nung amendaker February 1-3, 2019 anogotem nung Nagaland Baptist Church Council kübok Association 20 aser Associate züngsem pezü NBCC Convention Centre, Kohima nung 82buba Annual Council senden kaogo. Iba sentong nung o jembirtemji NBCC tir Rev. Dr. Hukashe Zhimomi, Kohima Ao Baptist Arogo nungi pastor Sentisashi aser Garo Baptist Convention nung Women Ministry indang director Jaksil A. Sangma nungertem liasü.
Iba mungdang nung tekülem agiba, tetsürtem, lanur aser Christian Education dak rangloker jembishinü akaba, ken tentepba dang masü saka tongtibang tezüngzüktep kar agia liasü. Item tezüngzüktep temji yamai alitsü:
1. NBCC ajanga Nütsüngtem Tenyaba (Mathi 28: 18-20) tanaben amshia arogo mission tali ulushidaktsütsü lemtet. Metongjemi aliba nütsüngtem dang Tsüngrem osang prokba den külemi asen müketa aliba aser jila balala nung maneni osangtajung metsü proktsü lemtet.
2. Iba mungdang nung adenertemi ‘care and support’ ministry tali ulushitsü pangjem. NBCC küboka Arogo aser Association tem rongsen aser nübu nüngdaka lir. Anungji jenjang tajung nung aliba Association aser Arogotem den iba khuret lemsatepa kati ka yariteptsü asoshi ajungshia Omen ‘Knitted Together in Christ’ nung aliba ama alitsü lemtet.
3. Nüburtem ajangzüktsü asoshi inyakba sentongtem ajak nung NBCC ajanga Nagaland sorkar den yariteptsü renem. Saka Khristan yimsü aser Laishiba-i sayuba anema inyakba sentong aser mapa nungbo arogo züngsem ajanga shilem magitsü. Tangartem dang asen Naga nunger sobaliba angatetdaktsütsü asoshi maongka agütsütsüba ka kanga tongtibang ta angateta arogoi nütsüngtem dang Yisui sayuba agizüka aser Laishiba yimya nung litettsüsa khuret abentsü lemtet.
4. Arogo aser lokti nung tetsürtemi shilem tajung agiba asoshi NBCC ajanga maneni nungita yaritsü aser maongka agütsütsü pangjem. Maneni akhi mapang nungi amshia aruba yimya koba nung tebur ya temaba ta züngshir, iba yimya ya samadaktsütsüla ta ajiteta sorkar nunga dena sentong balala yangluba nung tetsürtemi shilem agitettsü asoshi sabang lapoktsütsü kati ka den ajungshiteptsü renem.
5. Tanurtem aser lanurtem tali tali Laishiba nung shia aliba ama Khristan yimya nungi bilaa aoba ajiteta arogotemi Children & Youth ministry nung tali temulung agütsütsü lemtet. Laishibai sayuba anema temenen mapa jenti aliba ajanga asüngteta alitsü tasak kümogo. Tanurtem asüngteta lidaktsütsü asoshi parnok dang Apijemtsü Shin 22:6 nung ‘Tanur ka pei aotsüba lenmang nungji sayutetang’ aser pai taun akümdang iba nungi mepilatsü’ ta shia aliba ama lenla balala nung tesayuba agütsütsü tim, ta renem.
6. Linük ajunga den külemi Nagaland nunga Lok Sabha election agitsü renemba mapang ka lir, anungji NBCC kübok arogotem clean election sangdong nung akhanga nokdaka lir. Asen linük nung Tsüngrem ain adoktsüsa yimya amshiba nungi jenbua alitsüsa ochimashi anema nokdaka NBCC arogotemi maneni Clean Election Campaign nung bendanga agütsür inyaktsü lemtet.