Modi-i Wakching new model college nung building semzüktsü

February 03, 2019 nü Ato kilonser, Narendra Modi-i Srinagar nungi remote ajanga Wakching New Model College nung building semzüktsüba noksa nung angur.

Mon, February 04 (TYO): February 3, 2019 nü Sher-i-Kashmir International Conference Centre, Srinagar nungi Ato kilonser, Narendra Modi-i remote control ajanga Mon District nung aliba Wakching New Model College nung administrative aser academic blocks tasen semzüktsüogo, ta ketdangsertem osang ka ajanga metetdaktsü.
Digital ajanga Wakching New Model College nung administrative aser academic blocks tasen semzüktsüba sentongji Mon Deputy Commissioner indang Conference Hall nung agi, aser iba sentong nung Higher Education & Technical Education Minister, Temjen Imna Along aser MLA, Y.M. Yollow Konyak na dena liasü.
Iba sentong nung jembidang Minister, Imna Along-i Ato kilonser, Narendra Modi aser Ministry of Human Resource Development, Government of India-i Mon district kübok Wakching nung Model College tenzüktsüba atema pelaba metetdaktsü.
Paisa, terenlok team tajungtibaji Rastriya Uchchatar Shiksha Abhiyan (RUSA) lir, ta ashi.
“Tanü digital ajanga tenzüktsüba sentong nung asen Ato kilonseri linük tesem ajungalen jembiogo aser digital ajanga model colleges 70 semogo. Asenoki mangdang aliba lenir kati jembiba kuli süa nguogo, aser ibaji India tasen lir,” ta Imna Along-i shisem.
“India tasenba ya ajanga Naga nunger tasenji mapa meranga inyakba, nendaka inyakba aser yimya tajung ajanga züngshitsüla,” ta pai ashi.
Kasa sentong nung jembidang MLA, Y.M. Yollow-i zünger alir Konyak nunger lanurtem dang tashi aritsü agibo asen lokti ajungkettsütsü atema inyaktsüla, ta ajungshi.
Kasa sentong nung adener tongtibang nisungtem rongnung- Higher Education & Technical Education Secretary, Dinesh Kumar; Higher Education Director, Dr. I. Anungla Aier, Rashtriya Uchchatar Shiksha Abhiyan (RUSA) State Project Director, Menuokuolie Kire, NDPP president aser PDA Chairman, Chingwang Konyak; Nagaland State Commission for Protection of Child Rights Chairperson, Awan; OSD to Chief Minister, Mankhao aser sorkar ketdangsertem aika densema liasü.