Tsüngrem tsübuba yimsüsürtem

Kodang asenoki Tsüngrem tetshidir jet ta tamangba yimsü indang temulungi arur, kechiyong tenük agi Tsüngrem mangu saka amanger ta asüba agi tamanger ta ajar. Aji oda, menguaka alima nung yimsüsürtemi anir nütsüng nübortem ajaki Tsüngrem dak amanga Pa nüken tsübua alitsü aser inyaktsübaji kanga tongtibang lir. Chuba süaka, kilirsangji süaka temangbo mapang tatsüka lir külen ajungli küma aotsü aser tanülaji teyanglur dangi aotsü. Ibaji tetsübutsüka lir. Alima nung taküm alirtem madak Tsüngrem tashiji aji lir. Ajisüaka, alima yimsüsürtem aikati pei ket nung yimten tashi alidang Tsüngrema mali ama aser alima nung teti alitsü amai inyaker. Iba ama Tsüngrem tsübua yimsü asüba jenjangji asenok Naga Khristantem o Hindu aser Muslim nunger yimsüsürtem na medemdangra, asenokiang Tsüngrema mali ama inyaker ta asadangtettsü. Asenokibo züzüa bilemtsü akok saka Hindu yimsü amanger Narendra Modi-i India nung constituency ajak toktsür Varanasi Lok sabha parliamentary constituency bushia oagi toktepbaji tanga kecha agia masü saka iba yimti aser constituency-ji Hindu nunger asoshi temeshi yimti lir, anungji iba temoatsü aser tashi agia tokteptsü asoshi yangji oagi külemküja jungjunga agir election nüboyim tenzük aser ano takok ngur külena par tsüngremji mamadoki kasa temeshi yimti jagi arua tenüngsang agüja külemer külenang yimten mapa tenzük. Iba kasaji India nung Hindu nunger yimsüsürtem ajak parnok tekülemdak oa putir ajurua temoatsü meshia sarasademdaktsürang yimten mapa tenzüker. Ibaji dang masü saka Hindu nunger kidangi asenok odangra, ki shia nung parnok tsüngrem külemdak teronem menema yanglua lir aser yangji anepdang tzü chigur ano kecha mapa metenzükdang temoatsü meshia külemtsü aser nikongdanga külemer dang yipteni aitsü. Parnok tekülem agiba mapangbo tongtibang nisung kidangi aruyonga tamasa tekülem mapaji temmatsü aserang nüngdak ken o jembi tenzüktsü. Iba amaji Muslim nungertema küm nung ita ka songtema lumitsü aser pei mapa ajak nemdaka yutsür hopta nung khen tekülemdaki aotsü. Item tamangertem denji asenok yimten yimsüsürtem jenjang medemdangra, asenok yabo limapura masü aser tamangera masü ta tom nung lir. Asenok karibo anogo nung kena sarasadem mesüia alitsü. Tsüngremi temulungjang dang agir tabo asenoki tejembiba saka temulung nung tamajung bilemba agi sünga lir. Aji oda, temulungjang nung ochimashi inyaktsü bilemba agi ochimashir aser temulungjang nung mapa tamajung inyaktsü bilemba agi inyaker. Tangar Hindu aser Muslim nungerbo yimten yimsüsürtemjiang tamang nung tashi taitba akümer, ibayongji India nung Hindu nunger yimsüsürtemi Hindu yimsü nung kanga temulung agüja inyakba angur. Ajisüaka asen lima nungbo nübortemi dena yimten yimsüsürtembo Tsüngrem ashi manger, nisung tamajung, ashir aser auer amai dang bilemer. Aji oda, yimsüsürtemia yimten yimsüsüba menden nung amenbajibo Tsüngrem den tokteptsü amener amai bilemer. Ibayongji, Naga nunger yimten yimsüsürtem aikati Tsüngrem dang taochi meshia lumitsübajibo yutsür, küm nung Christmas nung khen tenla kidangi aoba dak alaka sentepia maor. Joko, electioni airtemjibo yijemer, tashiyim amshir aser nüktapangtar nisung amai bilemer aser item purtemji adoker yimsü asübaji temenenpurtemi yimsü asür amai bilemer. Tanü asen lima melenshidi süra tamasa nübortemi election-i aiertem indang tamajung bilembaji melentsüla aser election-i aiertemia election-i aibaji Tsüngrem anema mapa tamajung inyaktsü aier ama mebilemtsüla. Hindu nungertemi temeshi yimti bushia oa jungjunga külemer yimten mapa tenzükba ama aser pei kidang tekülemdak tesem balaka yanglua yur anepdang aser aonung methitemi tsüngrem külemba ama, asenok Naga Khristan-temia Tsüngrem dang asüngdanger külenang yimten mapa tenzüktsüla. Yimsüsürtemji tamang tirtem asütsüla. Idangji dang asen lima nung nisungi masü saka Tsüngremi yimsü asütsü.