Congress-i LS aser by-elections nung tokteptsü

Dimapur, February 4 (TYO): Taruba Lok Sabha election nung aser ano Mokokchung district kübok 26-Aonglenden Assembly Constituency indang by-election nung Congress-i tokteptsü ta tanü metetdaktsü.
Party-i Lok Sabha election aser 26 Aonglenden AC by-election nung tokteptsü atema renemdar, ta Nagaland Pradesh Congress Committee (NPCC) president K Therie-i ashi.
“Hindutva benoktsü merangba tashitem anema kasa tangatet aliba political party tem longjemtsüla. Maongka dang ngura, Congress-i asen maitsü kümzüka ayutsü atema Citizenship Amendment Bill anema inyaktsü,” ta K Therie-isa ashi.
Taoba mapang Congress lennir 8 aser AICC züngsem 4 party nungi anenja aliba mapang tembangogo aser iba jagi parnok anenja aliba agiener. Anungji parnok ajak party nung dena membership tasen kümshitsü ayongzüker, ta paisa shisem.
Taoba MLA asür Imtikumzuk September 22, 2018 nü ajungbena akümli toktsür aoba sülen 26- Aonglenden A/C menden tazüng aküm. March 23, 2019 matongdang iba menden nungi MLA ka shimtsüla.