NPF dena NE lennirtemi Home Minister den ajurutep

Dimapur, February 4 (TYO): Citizenship Amendment Bill (2016) anema noktakba nung tajangzük anguba ka aser Bill atema ‘North East Region’s Political Parties Convention’ sülen inyakba mapa ka ama February 3, 2019 nü North East nungi political party temi Union Home Minister den ajurutep.
Iba telok nung Naga People’s Front (NPF) dena liasü aser January 8, 2019 nü Lok Sabha nung CAB agizüba sülen northeast nung tensa mejungi akümba osang parnoki Home Minister dang ashi.
CAB indang onük jembitsü atema North East Region Political Party tem Guwahati nung jatepa senden ka amen. Iba senden nung NPF Legislature Party Leader T.R. Zeliang-i anir NPF züngsemtem aden, ta Press Bureau, Naga People’s Front, Central Headquarter-i metetdaktsü.
Yashi Central lennirtem den ajurutepba telokji Meghalaya chief minister Conrad Sangma (NPP)-i anir liasü aser iba telok nung NPF Manipur Unit President Awangbo Newmai dena liasü. Pa ya party tenüng nung aden, ta parnokisa ashi.
NPF Party-i CAB 2016 anema maneni noktaktsü aser iba onük atema Nagaland nung NDPP-i aniba PDA sorkari telemtetba takang magii Naga public ratadaktsüba aitsür, ta Press Bureau-isa metetdaktsü.
NPF-i northeast nung kasa tangatetba aliba political party tem den yariteptsü. Northeast nung lisopurtem ajungtsü aser kümzüka ayutsü atema inyaker ajak den onoki yariteptsü. O jembir saka mapa meinyaker ta asüba political party den meyatiteptsü, ta parnokisa shisem.
NDPP party-i o kanga mejembitsü saka mapa talila inyaktsü merangtsüla. NDPP-i aniba PDA sorkar nung cabinet-i mapang shia telemtetba melenshipet melenshir anungji tarutsü anogotem parnoki CAB 2016 magizüker ta lemtetba osang angashidang onok maoksatsü, ta NPF-isa metetdaktsü.
February 3, 2019 nü Central lennirtem den ajurutepertemji Meghalaya Chief Minister Conrad K Sangma (NPP), Meghalaya Dy. Chief Minister Prestone Tynsong (NPP), Atul Bora (AGP President), Prafulla K Mahanta (AGP Advisor), Awangbo Newmai (NPF President, Manipur Unit), Keshav Mahanta (AGP), Jitendra P Baishya (AGP), Mevar Kumar Jamatia (IPFT) aser P Choudhury (AGP) nungertem liasü, ta Press Bureau-i ashi.