Election nung tokteptsüba masü CAB anema noktaker: Tripura maharaja Debbarma

Agartala, February 5 (Agencies): Tripura Pradesh Congress Committee (TPCC) President Birajit Sinha-i Hombarnü TPCC ketdangpurtem den senden ka amenba sülen Lok Sabha election atema parnoki Royal Scion aser Congress National Secretary Pradyot Kishore Manikya Debbarma candidate ka asütsü shimer ta osang metetdaktsü.
Taruba general elections nung East Lok Sabha menden nungi tokteptsü atema TPCC-i Pradyot Kishore Manikya Debbarma shimer, saka tatembang telemtetbaji party high command aser candidate-i dang agitsü, ta Sinha-i ashi.
“Onoki East Lok Sabha menden atema Maharaj Pradyot Kishore Manikya Debbarma tenüng shidanger, saka pai tokteptsübaji pa aser party high command mulung lir” ta pai ashi.
Tanü Pradyot Kishore Manikya Debbarma-i osangbener den jembidang pai general elections nung tokteptsü jangra mali ta ashi.
“Ni Birajit Sinha den jembiogo aser pa dang Lok Sabha elections nung tokteptsü atema tangbo tejangraba mali ta shiogo. Tang atema kü indang tongtipang nükjidongji Citizenship Amendment Bill, 2016 (CAB) anema noktaktsüba lir aser iba mapa memenener” ta Debbarma-isa shisem.
Pradyot-i CAB anema jembiyonga arur aser yimtenren aser loktii dak sendakba sentongtem nung pai shilem agia arur. Tripura nung NRC mapa tenzükang ta asüba takhangba agütsüba nunga pai posema yariteper. Tawa Citizenship Amendment Bill, 2016 (CAB) anema sentong aika nung pai denogo.
Tawa tu, Chief Minister Biplab Kumar Deb-ia Debbarma dang kechiba pai Citizenship Amendment Bill, 2016 (CAB) anema noktaker ta asüngdanga liasü.
Debbarma-i CM Biplab-i jembiba o aitsü aser Congress party-i CAB posema nungitra pai party nungi tangsa anentsü ta ashi.