Kolkata police commissioner-i Meghalaya nung CBI den ajuruteptsü

Guwahati, February 5 (Agencies): West Bengal nung mangatettep ken o atema kanga dang taoksatsü aketba osang ka angashir aser ibaji Kolkata police commissioner Rajeev Kumar-i Supreme Court tetuyuba tashi angaa Shillong nung aliba Central Bureau of Investigation (CBI) dangi aotsü mulungba lir.
Iba ya ajanga West Bengal nung tang linük ajak anokshitsüsa tensa adoka aliba süngjema aotsü ama imlar.
Supreme Court-i the commissioner of police Kolkata, DGP aser West Bengal sorkar dang CBI-i benokba ken o nung ajemdaker iba osang sangoktsü.
Taoba mapang Supreme Court-isa CBI dang Kolkata police commissioner maputsü atema tenokdangba agüja liasü.
Iba ken o atema West Bengal Chief Minister Mamata Banerjee-i Deobar nungi mener lungkak aittsü tenzük aser Supreme Court-i telemtetba agibaji takok anguba mapa ka lir ta ashi.
Külen, Centre sorkari SC-i telemtetba agibaji takok anguba osang lir ta shiogo.
SC-i Rajeev Kumar dang February 20 nü Shillong nung CBI den ajurutepa kuli ajak agütsütsü aser Bengal nung chit fund ken o ajak bushisüngdangba mapa nung yariteptsü atema tetuyuba agütsü.
CBI telok kati Deobarnü Kolkata nung Rajeev Kumar dang Saradha chit fund dak sendakba nung asüngdangya asütsü merangdang Kolkata Police-i parnok ghonda ishika ka sota ayuba ajanga iba ken o adok.
Iba ajanga Mamata Banerjee aser Centre nung BJP tsüngda o mangatettep adoka o atsütep tenzük.