Kolkata police tongtiji aputsü makok, saka yariteptsüla: SC

New Delhi, February 05 (Agencies): Saradha chit fund ochimashi ken o dak sendakba nung tanü Supreme Court (SC)-i Kolkata Police Commissioner, Rajeev Kumar dang CBI matsüngdangi arua iba ken o bushisüngdangba nung yariteptsüla, ta tetuyuba agutsü.
Iba ken o nung Chief Justice Ranjan Gogoi, Justice L. Nageswara Rao aser Justice Sanjiv Khanna nungeri akumba bench-i, CBI-i tashiyim mamshitsüla, iba denji külemi police ketdangserji aputsü akok, ta oshidang agutsü.
Bench-isa Kolkata Police Commissioner dang CBI matsüngdangi aotsüla aser agency-i bushisüngdangba maparen nung mapang ajak nung yariteptsüla, ta ashi.
Menüngdakba mangatettep madoktsüla, ta shia SC-i, “Onoki Commissioner of Police dang koba anogo shimdir iba anogo nungji Shillong, Meghalaya nung aliba agency (CBI) ajurutsü tuyur,” ta ashi.
Attorney General, K.K. Venugopal-i mepishiba nung ajemdaker court-i tesemji Shillong shim. Court-isa West Bengal Chief Secretary, Director General of Police (DGP) aser Rajeev Kumar nunger dang Hombarnü CBI-i temepishiba ka aguja aliba nung telangzüba agutsütsü metetdaktsü.
Chief Secretary, DGP aser Kolkata Police Commissioner nunger dang 18.2.2019 anogo tashi nung telangzüba agutsütsü metetdakja court-i, parnoki agutsüba telangzüba nungji ajemdaker court-i February 20 nü parnok nüngdakra February 19 tashi nungbo parnok office nem iba osangji metetdaktsütsü, ta ashi.
Iba ken o angadangba mapang Attorney General, K.K. Venugopal-i, tang tensa ya temzüng inyakyim raksaba ka lir, ta ashi aser Solicitor General, Tushar Mehta-i, CBI ketdangsertemji police station ka nung pua ayu, ta ashi.
Kolkata Police Commissioner atema jembitsür, senior counsel, Abhishek Manu Singhvi-ia court dang, “Aibelen kecha meinyak, ajisüaka parnoki (CBI) ‘surrender’ asutsü asüngdanger,” ta ashi.
Paisa, “Rajeev Kumar anema yazü jembiogo. Pai CBI dang ajaki melungba tesem ka nung ajuruteptsü atema benok,” ta ashi. Maneni iba ken o ya February 20 nü angadangtsü.