Dimapur nung DPDB senden ayongzüka menogo

Dimapur, February 05 (TYO): Ita shia amenba Dimapur District Planning & Development Board senden February atema tanü Dimapur Deputy Commissioner indang conference hall nung ayongzüka menogo; iba senden ya Deputy Commissioner Dimapur, Kevekha Kevin Zehol, NCS mendenbuba ser amen, ta tanü ketdangsertem osang ka ajanga metetdaktsü.
Senden nung society balala Registration atema o lemtepba sülen Board züngsemtemi Life of Hope Ministry, North Block Burma Camp Dimapur aser Dimapur Bongs, Kalibari Road near DMC Office society registration atema benoktsü lemtet.
Board-isa verification report nung ajemdaker GMS Sematila agi GHS upgrade asütsü aser GMS Indisen agi GHS upgrade asutsü atema benoktsü lemtet.
District atema aspiration block shimba dak sendakba nung Board-i Aghunaga block agizük, iba ya Rural Development Department-i jangjateta lir.
Senden nung DC-i züngsemtem dang ita shia DPDB senden nung medema adentsüji kanga tongtibang, anungji senden ajak nung medema adentsü ayongzük.
Dimapur nung posting atabaji kanga tia taka, ta shia DC-i district heads ajak dang district ajungtsü atema pei nem lemzüktsüba mapa kanga nendaka inyaktsü ayongzük.