Mangkolemba Agri. Dept.-i ninang metsüba nung tesayuba agütsü

Dimapur, Tsüklai/February 05 (TYO): Lizo yimtsüng nung February 5, 2019 Mongalbarnü NFSM (Oilseeds) kübok Dept. of Agriculture, Mangkolemba-i menjang (Rapeseeds aser Mustard) agi ninang metsüba indang nung tesayuba ka agüja liasü.
Iba sentong nung SDAO, Mangkolemba A. Temsu Aier-i telok pelaa agizükba o jembi aser iba denji külemi pai, nübur rongsenkettsüng aser achi ajemba nung menjang lu ayimba indang tongtibang shilem nung ajemdaker rasa ashi.
Paisa, sentong nung adenertem dang, aluyimba tsütsü meranga inyakba ajanga ka ita peria alitsü, tsünüsenbongtsü nung mozü mera (Chemical) tajemba amshitsü aser ninang wazüka ayutsü atema organic farming inyaktsü atema tajungshiba agüsü.
Pai ashiba agi, aluyimba nung ninangi tongtibang shilem ka agir, kechiyong ninangi aonsotsü nung tanang mesepzükba ajanga aonsotsü junga züsenteter. Naro aser jebi nungi tetzü mesepzüka ninangi mochitzü yangluba ajanga nisung temang anema lidaktsür, aser aluyimertema ajangzüker.
Paisa ninang metsühba aser ninang mochitzü ayimba indang tesayuba aguja liasü.
Iba tesayuba sülen, Talisunep, AFA-i IPM (Integrated Pest Management) nung training agüja liasü.
Pai ashiba agi, aluyimba nung metsük mesen azüoktsü aser tarutsü nung aonsotsü timba züsentettsü atema IPM inyakyim ajanga chemical amshiba maparen ajemdaktsüba nung takok ngua liasü.
Aluyimba nung mozü mamshitsü aser yoka aliba tsünüsenbongtsütem mapang shia reprangtsü asoshi ajungshia liasü. Iba denji külemi, aluyimer dang aonsotsü tem metsük mesen nungi kümzüka ayutsü atema angi aser sang tapu balala amshitsü asoshi metetdaktsü.
Iba sentong temer sülen, Bee box, IPM kits aser Roban cakes tem lema agütsü kong aluyimer 20-i shilem agia liasü.