Supreme Court-i Centre aitsür

New Delhi, February 5 (Agencies): Centre-i National Registration of Citizens of India (NRC) mapa meinyakdaktsünür ta February 5, 2019 nü Supreme Court-i Ministry of Home Affairs (MHA) aitsü.
“Centre-i iba maparen raksatsütsü atema otsü balala ashir. MHA-i NRC maparen samatsütsü atema inyaker ama repranger” ta Chief Justice Ranjan Gogoi-i aniba Supreme Court bench kati tanü ashi.
Central Armed Police Forces (CAPF) pur election duty lemzükba ajanga NRC mapa hopta ana meinyaki atatsüla ta Centre-i SC nung temepishiba ka benokba angadangdang bench-i iba jashiba olen ashi.
“Nenoki NRC mapa inyaknüra, iba mapa inyaktsü atema lenmang 1,001 tashi lir. NRC mapa ya maneni inyaktsüla. Onok kanga mepelar” ta SC bench-i ashi.
Centre-i NRC maparen nung meyariteper aser July 31, 2019 nü tembangtsü atema anogo latetba sülen joko mapuloktsütsü, ta parnokisa shisem.