Conrad Sangma ya NE ‘hero’ masü: Congress

Tura, February 5 (Agencies): Meghalaya Chief Minister, Conrad K Sangma-i inyakba ajanga Rajya Sabha nung CAB mebenok ta jembiba o Congress-i aitsür.
BJP lennir Hayithung Bill Lotha-i Meghalaya chief minister ya NE indang ‘hero’ lir ta jembiba sülen Meghalaya Pradesh Youth Congress president, Richard Marak-i “iba ya pei sasa tenüng tajung angutsü atema inyakba mapa dang lir” ta aitsüogo.
MPYC-isa National People’s Party (NPP) indang tiyazütem jungkai adoka sayutsü ta metetdaktsüba den külemi “Conrad anishirtemi benokba CAB anema pai (Conrad) noktaker ta o agi jembiba ajanga tamakok anguba nungi tenüng menük magitsü atema iba mapa inyak” ta ashi.
“Taoba anogo ishika social media nung Hayithung Bill Lotha ta ser mejangjatetba nisung kati Conrad dang NE hero ta jaloktsü. Lotha-i ashiba agi Conrad-i Rajya Sabha nung CAB benoktsü aliba noktang” ta MPYC president, Richard Marak-i metetdaktsü.
“Lotha ya shiba’ar shingaia memetet aser pai NE nunger tenüng nung pai koma noktaker’ar mejangja, saka pai tiyazü aser tangari anishir lennir ka dang hero ta jaloktsübaji mangateter. Iba ya pei sasa tenüng asangba mapa ka onokibo angateter” ta Marak-isa shisem.
“Kechi südir süaka Bill agizüktsü ta merangba party kati kodaser parnok anema noktaker ka dang hero ta jaloktsütsü? Onoki Conrad Sangma tamendakdak maliba nguogo aser pai pa sasa junger ta jembiba senzüba ama BJP indang mapa atema jembir. Pa (Conrad) aser pa den külemi yaritepertemi Prime Minister den ajurutepi ao saka majurudaktsü” ta paisa metetdaktsü.
“Deobarnü PM Narendra Modi-i Jammu nung BJP-i CAB agizüka ozüng kümdaktsütsü ta ashi aser iba sülen BJP national general secretary, Ram Madhav-ia Rajya Sabha nung CAB agizükdaktsütsü atema supplementary bill ka ama benoktsü ta shiogo. Conrad Sangma maneni sendoka PM den tanaben-a majurutepdaktsü. Meghalaya aser North East nung alirtem ya suwartem masü” ta Marak-isa ashi.
MPYC-i maneni Citizenship Amendment Bill 2016 (CAB) anema noktaktsü aser tangar nem anishidaktsürtem jilushi aiba mapang, tangartembo mejangi moi bill agiendaktsütsü atema mapa inyakdar. Onoki parnok den noktaker aser India anema inyakertem aser BJP aser parnoki anishirtem anema raratsü” ta MPYC-isa metetdaktsü.