National SC-ST Hub (NSSH) State conclave agi

February 5, 2019 nü Agri Expo Hall, Dimapur nung Industries & Commerce Advisor, Imnatiba -i Directory of MSMEs on Nagaland state sayatsüdang agiba noksa angur. 

Dimapur, February 5 (TYO): February 5, 2018 nü Agri Expo Hall, 4th Mile, Dimapur nung National SC-ST Hub (NSSH) State conclave agia liasü.
Iba sentong ya Forum of SC and ST Legislators Parliamentarians den yaritepa ayongzüka agi.
Sentong nung tetushi süa jaoker Industries & Commerce Minister, Imnatiba-i o jembidang, Prime Minister Narendra Modi-i alizüng ayuba ataloktsü atema tayongertemi Nagaland angatettsüla ta ashi.
“Tanga North East state tem nung inyakba mapaji Nagaland nungbo mapettsü akok. Anungji ketdangsertemi Nagaland nung iba mapa inyakdang kanga dang anepalua inyaktsüla” ta paisa ashi.
State indang rongsenkettsüng ajungkettsübaji entrepreneur tem dak keta lir, anungji lanur entrepreneur temi alizüngtem tongtettsü atema yariteptsü ayongzüker, ta Imnatiba-isa shisem.
Tanü sentong nung Advisor Imnatiba den külemi tanga ketdangpurtemi Directory of MSMEs on Nagaland sayatsü.
Industries & Commerce Commissioner Secretary, Lithrongla Chishi-ia entrepreneur tem dang takok ya khen nung mangur anungji bendanga agüja aser aremzüka mapa inyaktsüla ta ashi.
Naga nungertemi kechisarena aika apiteta inyakteter. Iba sempetji asenok dak masodang nungi keta lir anungji asenoki tamshi ashitsüla. Entrepreneur temi tajungtiba inyaktsü merangtsüla aser ‘customer friendly’ yimya alitsüla, ta Lithrongla-isa ayongzük.
Sentong nungsa MARCOFED Chairman-i Nagaland nung süngdonglidong aser aou tapu aika lir anungji asenoki iba ajanga rongsen bendentsüla ta ashi.
India sorkar asenok nem facility aika agütsür saka asenoki sen zübazüba angutsü aser subsidy dang arishir. Iba tangatetba ya melenshitsüla aser loktiliba nung temelenshi bener arutsüla ta MARCOFED Chairman-isa ayongzük.
Iba programme ya tang aliba SC/ST entrepreneur tem yaritsü atema inyakba mapa ka lir. NSSH-i state sorkar den külemi yaritepa iba asoshi mapa inyaka arur, ta National Working President, Forum of SC and ST Legislators Parliamentarians aser Director General, Dr. Ambedkar Chamber of Commerce, Inder Iqbal Singh Atwal-i ashi.
Sentong nung Zonal General Manager, NSIC, North East, Dr. Avinash Chaudhary-i tesentepertem pela agizük aser Branch Manager, NSIC- NSSHO, Guwahati, Peter Thawngneihchina-i anküp tepela o jembi.