RN Ravi-i Imphal nung nübortem ajurua shisalemsatep

Kohima, Sept. 11 (TYO): Naga yimten tebilemtsü tatembang küma latettsütsü asoshi India sorkar tenüng nung Naga nunger yimten nüjiso bushir telok balala den jembir, R.N.Ravi yashi Brehostibar nü Imphal tonga aru aser aruli nungi pai Manipur nung yimsüsürtem den aser tongtibang lokti tentet lenirtem ajurua parnok den shisalemsatepa mongogo.
Pa den jembidang, Manipur nunger mulungtet lokti tulutiba All Manipur United Clubs Organisation (AMUCO) aser United Committee Manipur (UCM) teloktemi Manipur nung kin kidong apia yimten aser sobalibaren melatettsüla kechiyong iba jagi Manipur nung aliba kintem tsüngda telemsa adokdaktsür asütsü ta metetdaktsü.
India sorkar nungi Joint Intelligence Committee mendenbuba aser NSCN-IM telok den India tenüng nung jembir, RN Ravi yashi Brehostibar nü Imphal tonga aruba sülen pai Chief minister, O Ibobi ajuru aser lokti tentet balala nungi lenirtema ajurua liasü.
RN Ravi-i tamasa United Naga Council lenirtem Hotel Classic nung ajurua jembia liasü saka parnok tsüngda kechi jembiar ibaji mejangjatetter.
Yashi nikongdang 2:00 ako nung Chief minister, O Ibobi ajuruba sülen, RN Ravi-i AMUCO, UCM aser Committee of Civil Societies, Kangleipak (CCSK) nungertem kasa hotel nung ajurua liasü. Paisa International Meitei Forum aser High Court Bar Association, Manipur telok nata ajurua liasü.
Pa Imphal airport tonger külen osangbenertem den jembidang, R.N. Ravii paji Manipur nung lokti tentettem den ajurua shisalemsateptsü aruba liasü ta ashi. India sorkari nisung ajak tebilemba angadangtsü aser ajak asoshi yimjung nung alitsüsa telemtetba tajung ka bener arutsü ta Raviisa metetdaktsü.
Pa Imphal nung amongba mapang, AMUCO, UCM aser CSSK nungertemi tezüluba nung parnoki aginüba onüktem zülur agütsü. Iba tezüluba nung AMUCO president Dr Y Mani Khuman, UCM president Elangbam Johnson aser CCSK president P Arjun nungertem tenüng liasü. Parnoki RN Ravi ajuruba sülen, Elangbam Johnson-i parnoki Ravi nem tezüluba nung agütsüogo ta ashi saka parnok tsüngda kechi jembiar ajibo pai temai adoka mashi.
Manipur nunger mulungtet telok asemi züluba shidi nung , India sorkar o NSCN-IM na tsüngda Naga yimten tebilemtsü indang jembiba maparen yagi Manipur otsü aser yimten dak kongshitsü ainungji, parnok tsüngda kechi jembiar itemji Manipur nungertemi metettsüla ta takangba agüja lir.
India sorkari 1997 küm nungi NSCN-IM den jembia aruba telemtetba aser onüktem ajak den August 3 nü renemba onük dena tezüluba nung agütsütsüla aser itemji nübortemi metettsüla ta parnokisa ashi.
India sorkari Manipur nunger otsü aser yimten jenjang akümtsübua amshitsüla aser kin tapu balala süaka külemi tesünep nung litetbaji züngshitsüla ta Manipur nunger lokti tentettemisa ashi.
Onoki Nagaland nung alir Naga nungertemi pei yimten temeten asoshi taküm tenla agüja inyakba mapatem meteta lir aser parnok mapa onokia nungiter, iba kasa tangatetbaji Nagaland nung alir Naga nungertem dak nungi imlar ta parnokisa metetdaktsü.
Manipur nung aliba nübortemi yimten jenjang tajungba bushiba aser lokti aser rongsenren renloktsü asoshi inyakba mapatem ajak ataloka alitsüsa inyaktsü aser item ajakji Manipur yimten kübok kümzüka ayutsü ta Manipur nunger lokti tentettemisa metetdaktsü.