Ya odangbo masü !

Linük nung tang Citizenship (Amendment) Bill (CAB) benoktsü aliba anema Norheast nung aser ano talisa Nagaland nung tensa mesüngjemteti akümba ya odangbo masü saka nübortemi government dak temulung melemtetba temaitsü lir. Iba onük ya Lok sabha nungbo agizükadokogo aser BJP teloki tekong meranga Northeast nung alirtemi ayimtenba ola mangashii ma ta ser inyakra, Rajya sabha nunga, ashiko, asüng benoktsüa akok. Linük nung Congress teloki anir opposition teloki Rajya sabha nungbo iba onük ya agizüktsü makoktsü ta metetdaktsüogo saka ano külen yakanü tashi nunga ato kiloner Narendra Modi-i Assam nung lokti senden nung jembidang, iba onük ya tatar hoho anaprongla nung latetaka mapa küma inyaktsü asoshibo state government dak dang akettsü, kechiyong state government temelaba magii iba temzüng ozüng kübok bendanger nem senso temeten magütsütettsü ta metetdaktsüogo. Tetezü, BJP telokibo kechisüdirsüaka iba onük ya linük nung mapa küma inyaka aotsü merangtsü. Aji oda, parnoki bilemba amaji, Muslim nunger lima Bangladesh, Pakistan aser Afghanistan limatem nungi Muslim nunger masüba purtem reshikangshi marem shirnok jena aruagi India nung jenoka ali, item nemji India senso agütsütsü asoshi tang takoktsü lenmang ana anünga lir. Kaji, Lok sabha nungbo agizükadoker asünungji Rajya sabha nunga agizüka temzüng akümtsü merangtsü aser aji mekoktetra, tatar hoho nung agizüka temzüng maküm tsüngda rongdak nüngdak mapatem inyaka otettsü asoshi, temzüng nung lateta aliba ama, government-i dang tatar hoho majangi ita trok asoshi temzüng ozüng (ordinance) küma latettsüa akok. Atangji, iba bill ya kodang latetdir, iba jagi Hindu nunger dang masü saka Muslim nunger masüba tanga tamangba yimsü amangertem dena ajangzüktsüsa densema lir. Ajisüaka, Hindu nungertem dak alaka item Muslim nunger limatem nungji sensobo senso ser nung tamangba yimsü balaka asübayong reshikangshiba agi melitetba tanga yimsü amangertem aikabo malitsü. Iba ama tamangba yimsü agi anar bendangertem nem senso temeten agütsütsü tenzükra, atangji, iba jagi khen nung nütsüngbo kanga renloktsü aser vote agütsütsü purtema aika akümtsü, saka linük nung akaba rongsen aser mapa agi meperi akümtsü. Item tebilemtsütemji shitakba nung ataloka nükla nung anguba agi, tanü Norheast aser talisa Nagaland mesüngjemtet kümogo. Joko, Nagaland nunga Nagaland GB Federation-i dena iba ama temzüng ozüngjibo melatetdaktsütsü atema Nagaland ajunga mokdangtsü apusoba ya odangbo masü. Delhi nung aliba government-ji khen yutsür yangi Kohima nung aliba government-i iba tatalokba aser onük ya kanga süoki ia bilemtsüla. Atangji, Nagaland nung yimsüsür tazüngpurtemi anir iba CAB onük anema nokdaktsü bangjemogo saka ibaji chiadoker machi kümdi ta asüba amato lir, kechiyong Lok sabha nung iba onük benokdangbo Nagaland MP-a tagizüker rongnungji denogo. Tanü asenok yimten tensa tia aser tangatetbaji iba jenjang nungji lir. Ibayongji, nübortem mulung animesüngzüktetter. Nagaland nung assembly aser lok sabha election agir ano küm ka majung saka nübortemi state government daka kanga temulung malem tenzükogo. Ibayongji, tanü ama nübortemi mokdangba ajanga state government aiben timtem ajurutsüsa akümer. Tang amai government o nübortem na tsüngda temulung melemteptettsüsa tensa mapang mesoitet odaktsüra, ashiko, nübortemi tashiyim amshia government atsüngdoktsüsa mapanga arutsü. Election nung national aser regional teloktemi nangzükba ken o kata mapa küma mataloker aser election temer külena kecha balaka nübortem mulung anisüngzüktsüsa teimla magütsür. Ibayongji nübortem shisabolur aser kanga jashir. Iba tejashiji süngjema aotsüsa nübortem nem teimla magütsütetra, nübortem tejashi ya bomb tesashi kümer apoktsü ana nung dang lir.